Dështimi për të formuar institucionet e reja të vendit edhe dy muaj pas zgjedhjeve të 11 qershorit ka nisur t’i shqetësojë edhe ambasadat e akredituara në Kosovë.
Ambasada e Gjermanisë, në një prononcim dhënë gazetës “Zëri”, ka thënë se situata e krijuar ka nisur të bëhet brengosëse.
Sipas tyre, edhe pse situata të tilla janë paraqitur edhe në vende të tjera, atje të paktën ka funksionuar administrata dhe sektori publik, çka nuk po shihet të ndodhë në Kosovë.
“Tashmë pothuajse dy muaj nga zgjedhjet e qershorit duhet të themi: siç duket kjo çështje merr kohë aq sa nevojitet. Kemi parë shtete në BE të cilave u është dashur madje më shumë se një vit për ta arritur një koalicion. Dallimi në mes tyre dhe Kosovës është që administratat e këtyre vendeve mbeten funksionale, sektori publik punon, punonjësit në sektorin publik vazhdojnë punën sikurse më herët, edhe nëse një qeveri e re nuk është formuar ende. Kjo nuk duket se vlen për Kosovën dhe për këtë arsye të gjithë jemi të brengosur”, thekson Ambasada Gjermane..
Nesër është thirrur vazhdimi i seancës konstituive të Kuvendit për të zgjedhur kryetarin dhe nënkryetarët, por koalicioni PDK-AAK-NISMA që duhet të propozojë kandidatin për kryekuvendar nuk dihet ende nëse do të marrë pjesë në seancë, pasi dy herë e ka bojkotuar atë pasi nuk i ka votat e mjaftueshme për ta zgjedhur. /tesheshi.com/
