Nga Mensur Krasniqi
Për dallim nga bisedat e zakonshme maratonike mes katër partive më të mëdha politike në vend, me ndërmjetësim edhe të ambasadorëve, atij amerikan dhe të BE-së për dalje nga kriza, që shpesh herë dijnë të zgjasin deri në orët e vona, takimi i sotshëm zgjati vetëm dy orë. Në fillim të takimit përfaqësuesit e grupeve negociuese të partive u shprehën optimist se sot mund të jetë një ditë vendimtare për përfundimin e krizës politike, mirëpo ambasadori amerikan Xhes Bejli pas takimit njoftoi se nuk është arritur marrëveshje mes palëve dhe se bisedimet do të vazhdojnë gjatë ditës së nesërme.
“Patëm më shumë diskutime sot. Përveç që i vazhduam bisedimet dhe dëshirën për të arritur rezolutë për çështjen, nuk arritëm marrëveshje të cilën do të mund tua kumtoja. Prandaj do të vazhdojmë nesër”, deklaroi Xhes Bejli, ambasador i SHBA-ve.
Nga qëndrimet e partive më të mëdha maqedonase, VMRO dhe LSDM mund të kuptohet se ata edhe më tutje janë larg kompromisit për kompetencat e ministrit të punëve të brendshme dhe mandatin e tij në qeverinë teknike. Sipas tyre kjo është pika e vetme që ka lënë peng arritjen e marrëveshjes.
Nga VMRO frikësohen se ministri i përkohshëm i qeverisë teknike që me shumë gjasë sipas marrëveshjes duhet jetë ndonjëri nga përfaqësuesit e LSDM, të mos mundet të shkarkojë gjithë kuadrin e VMRO-së në këtë ministri gjatë 100 ditëshit para se të mbahen zgjedhjet, si dhe mandati i tij të përfundojë një ditë pas përfundimit të zgjedhjeve, nëse LSDM i humb ato.
“Nëse LSDM është e bindur se do të fitojë në zgjedhje dhe nëse LSDM ka qëllime të ndershme në MPB, gjegjësisht vetëm të kontrollojë dhe të mos lejojë të keqpërdoret MPB për qëllime politike, atëherë ne mund të kemi marrëveshje që sot. Le t’i pranojnë këto principe racionale dhe të logjikshme dhe sot do të kemi marrëveshje”, tha Nikolla Todorov nga VMRO-DPMNE, para takimit të sotshëm.
Ndërsa nga ana tjetër, LSDM janë kundërpërgjigjur duke thënë se ata sillen në mënyrë konstruktive dhe japin propozime për zgjidhje, por akuzuan VMRO-në se kjo parti ik nga krijimi i kushteve për zgjedhje të lira dhe demokratike.
“Në bisedime nuk është poentata të jeni kokëfortë, por është e rëndësishme të dini se çfarë ju nevojitet, jo neve ose ndonjë partie tjetër, por qytetarëve të RM dhe këtij shteti. Zgjidhja e krizës, zgjedhje fer dhe demokratike, gjithçka nën këtë për ne është e papranueshme. Megjithatë të gjitha idetë që mund të na çojnë në zgjedhje fer dhe demokratike dhe zgjidhja e krizës e cila qytetarëve dhe këtij shteti ju mori shumë kohë, e gjithë kjo ja vlen të shqyrtohet”, u shpreh Radmilla Sheqerinska nga LSDM.
Për partitë shqiptare si duket nuk paraqesin problem kushtet për arritjen e një marrëveshje për dalje nga kriza politike. Ata si çdoherë ngelen peng i mosmarrëveshjeve të partive maqedonase, dhe në fund do japin “aminin” për çfarëdo lloj marrëveshje. Kështu deputeti i BDI-së, Artan Grubi para takimit të sotshëm u shpreh optimist se kjo marrëveshje mund të arrihet që sot ose nesër, ndërsa zgjedhjet sipas tij mund të mbahen më 11 dhjetor të këtij viti.
“Bisedimet zhvillohen në një atmosferë shumë pozitive dhe konstruktuvie dhe kemi arritur shumë pranë një marrëveshje. Shpresoj se marrëveshje do të arrijmë sot ose nesër që do të nënkuptojë se data e vetme e mundshme për mbajtjen e zgjedhjeve këtë vit është 11 dhjetori sepse të gjitha datat e tjera tanimë janë të pamundura. Shpresoj se dy partitë maqedonase VMRO-DPMNE dhe LSDM do të tejkalohen mes veti sepse dallimet janë minimale”, tha Artan Grubi, BDI.
Nga partija opozitare shqiptare, PDSH nuk janë prononcuar lidhur me takimin e sotshëm.
Dhe në fund, gjëja pozitive nga bisedimet e partive politike është arritja e një kompromisi të përbashkët për dy pikat kryesore për mbajtje të zgjedhjeve të lira dhe demokratike, si pastrimi i listave zgjedhore dhe reforma në media. /tesheshi.com/
