Shefi i politikës së jashtme të BE-së Josep Borrell shprehu shpresë se vendet evropiane nuk do të duhet të dërgojnë trupa në kufirin greko-turk për të ndaluar një valë të re të mundshme të refugjatëve sirianë.
“Shpresoj se nuk kemi nevojë të angazhojmë ushtrinë,” tha Borell kur u pyet nëse ai pa një rol për trupat e vendeve anëtare të BE-së në kufirin greko-turk.
Borell tha se pajtohet me Turqinë se ndihma e Bashkimit Evropian për atë vend nuk është e mjaftueshme, sepse situata e sotme është më e vështirë se ajo në vitin 2016, kur u arrit një marrëveshje e ndihmës financiare me Turqinë në këmbim të mbajtjes së refugjatëve.
“Ne do të vazhdojmë të ndihmojmë sa më shumë që të kemi mundësi, por vazhdojmë t’u themi atyre se shtytja e njerëzve drejt kufirit nuk është zgjidhje për askënd dhe se i vë njerëzit në rrezik. Ne duam të vazhdojmë bashkëpunimin, por jo aq sa t’i bindim njerëzit se ata mund të arrijnë në Evropë,” tha Borrell.
Borell u tha gazetarëve gjatë një vizite në Ankara se BE do të ndajë një ndihmë urgjente humanitare prej 170 milion eurosh në Siri. /tesheshi.com/
