Mbyllja e përkohshme dhe situata kaotike e bankave greke brenda territorit të shtetit helen dhe jashtë vendit nuk ka ndikuar aq shumë tek filialet e bankave greke në Shqipëri, por gjithsesi një ndikim ka pasur.
Ditën e sotme ka pasur një kujdes të tepruar në të gjitha filialet e NBG, Alpha Bank, Emporiki dhe Tirana Bank. Marrja e një foto nga sportelet apo nga ambjentet e jashtme nuk është lejuar nga rojet e sigurisë, dhe kudo vëreje një stres të përgjithshëm. Një punonjëse në një nga filialet greke në Tiranë, i tha tesheshi.com se ka pasur një fluks të përgjithshëm të tërheqjes së depozitave, por gjithsesi kjo ka ditë që ka ndodhur. Prej një muaji një numër i konsiderueshëm qytetarësh kanë hequr depozitat e tyre nga bankat. Në fat këtë e ka pranuar edhe Guvernatori i Bankës së Shqipërisë, gjatë një interviste për Top Channel ditën e djeshme.
Megjithatë, kriza greke po jep realisht efektet edhe tek ne, pavarësisht se autoritetet duan të qetësojnë situatën. Ditët e fundit është vënë re një tërheqje jo e vogël depozitash nga filialet e bankave greke duke i nxjerrë këto para fare nga qarkullimi bankar apo edhe duke i transferuar në institucione të tjera që funksionojnë në Shqipëri. Bankat greke kanë një numër të konsiderueshëm edhe të kredive të këqija dhe janë praktikisht pronare dhe të një pjesë të pasurive të patundshme të shqiptarëve, të cilat nuk përjashtohet transferimi apo shitja në tregun grek të real estate.
Bankat greke kryesojnë në renditjen e huadhënësve problematikë. Deri në fund të 2013-s, Tirana Bank kishte 50% të huave të pakthyera në afat; Alpha 37% dhe NBG 34%.
Tre bankat greke, zotëronin në fund të 2014-s rreth 16% të totalit të depozitave në sistem, ose rreth 1.2 miliardë euro, sipas statistikave të Shoqatës së Bankave, ndërsa përbënin 18% të stokut të huadhënies. Raporti kredi/depozita për të tre bankat greke ishte 62% në fund të vitit 2014, nga 55% që ishte mesatarja e sistemit, me NBG që e ka më të lartë këtë tregues në 83%, sipas të dhënave të përpunuara nga statistikat e Shoqatës së Bankave.
Në Shqipëri, bankat greke ndodhen aktualisht nën “ethet” e mëmave, të cilave iu është kërkuar nga Banka Qendrore Europiane që të ulin ekspozimin e degëve të tyre në rajonin e Ballkanit. Ekspozimi i bankave greke monitorohet çdo ditë, në mënyrë që ato të mos kryejnë dot transferime likuiditeti. Sejko ka pohuar se, edhe nëse ndodh më e keqja, janë marrë të gjitha masat për sigurimin e likuiditetit dhe menaxhimin e bankave./tesheshi.com/
