Prej disa ditësh aleatët e kreut të PD-së, Lulzim Basha, nuk kanë kursyer kritikat në drejtim të tij, ndërsa kërkojnë një tjetër qasje dhe funksionim të opozitës.
Kreu i PR-së, Fatmir Mediu dhe më pas aoi i LZHK-së, Dashamir Shehi, që do të vijojnë të jenë deputetë falë përfshirjes në listat e kandidatëve për deputet të PD-së, kanë kërkuar nga Basha të tërheqë ministrat teknikë nga qeveria, por edhe të ndryshojë mënyrën e drejtimit të opozitës, veçanërisht përsa i takon vendimmarrjes.
Por në përgjigje të kritikave nuk ka reaguar asnjë prej drejtuesve demokratë, përfshi këtu edhe Lulzim Bashën, por këshilltari i tij, Edi Lesi.
Përmes një komenti në rrjetet sociale, Lesi i ka cilësuar aleatët si persona që marrin rolin e “zonjës tefta”, apo si politikanë që kanë mbi 20 vjet që nuk dua të hapin rrugën për një lidership të ri në partitë e tyre politike.
“Jane shfaqur ca aleatë që japin receta ç´duhet të bëjë PD. Pak të thuhet si zonja Tefta që tregon si gatuhet bifteku dhe çfarë vlerash kanë zarzavatet në verë.
Më shumë ngjajne me dermatologët që të mësojnë se dielli i mesdites duhet shmangur.
Predikime banale pa asnje të re, pa asnjë ide, ndërkohë që leksioni i vetëm që mund të jepnin është t´i kishin hapur rrugë lidershipit të ri në partitë e tyre që i mbajnë në xhep, si orët e qëmotit, prej më shumë se dy dekadash”, shkruan Lesi.
Por në përgjigje të këtij komenti të këshilltarit të Bashës, ka reaguar anëtari i Këshillit Kombëtar të PD-së dhe njëri prej kordinatorëve të PD-së, aktori i humorit Julian Deda.
“Aleatët e PD, që sot po na bezdisin se po i japin mend Bashës, kur vinin në çadër ishin të mirë dhe besnikë. Pikërisht për këtë ata morën si shpërblim futjen e emrit të tyre në listën e PD.
Morali: kur i shkon mbrapa Kryetarit ështe mirë, kur mendon ndryshe je kot dhe i keq”, shkruan Deda në faqen e tij në rrjetin social. /tesheshi.com/
