Azgan Mërnica, 23-vjeçari që vrau me një plumb në kokë policing 28-vjeçar Novruz Cenalia, ngjarja e ndodhur në Baltëz të Fierit, u vetëdorëzua te Policia, pas afro dy ditësh kërkim të tij, edhe me shpërblimin e 30 mijë eurove për informacionet rreth tij. Me të dhënat e një krimineli të lindur, me pothuajse të gjithë familjen e inkriminuar veç të ëmës, gjithsesi me një vrasje që e kreu në sy të saj, a u shfaq duke hyrë në makinën e Policisë krejt i qetë, madje dhe i qeshur.
Dhe krejt pabesueshëm, një zë gruaje në sfond nga familjarët, i përmend dhe Zotin, me shprehjen: “Azgannn… Zoti para, hajt rruga e mbarë!”
Në deklaratën zyrtare të Policisë, thuhet se vetëdorëzimi ka ardhur nga pamundësia për t’i shpëtuar rrethimit policor.
“Veprimet Operacionale u shtrinë në një perimetër shumë të gjerë në zonën ku ndodhi ngjarja, duke përdorur dronë të cilësisë së lartë, të cilët kanë monitoruar zonën gjatë gjithë kohës. Po në kuadër të veprimeve operacionale, u ngritën pika kontrolli në gjithë akset rrugore, u forcuan shërbimet në pikat e kalimit, në kufirin jeshil dhe blu.
Paralel me veprimet operacionale në terren, Departamenti i Policisë Kriminale ka zhvilluar negociata me familjarët e autorit për t’u vetëdorëzuar.
Në pamundësi për t’u larguar, familjarët kanë vetëdorëzuar në Polici autorin e vrasjes së punonjësit të Policisë shtetasin Azgan Mernica, 23 vjeç, i cili aktualisht ndodhet në ambientet e Drejtorisë Vendore të Policisë Fier”.
Vetëdorëzimi i këtij vrasësi gjakftohtë ndodhi pak orë pasi viktima e tij, polici Cenalia, u përcoll në banesën e fundit nga familjarë e kolegë.
Sipas raportimeve të këtyre ditëve, nuk ka qenë thjesht një rast kriminal i izoluar, por një krim që reflektonte si natyrën kriminale të një familje ashtu dhe paprekshmërin e saj, e tij apo dhe një rrethi shoqëror kriminal, nga ana e Policisë lokale.
Vetëdorëzimi i tij duke qeshur, tregon delikuencën e ekstreme të një vrasësi, por dhe karshillëkun ndaj shtetit. /tesheshi.com/
