Fshati Blacë i Pogradecit u trondit mëngjesin e kësaj të diele nga një krim makabër, i ndodhur në familjen Mekolli.
Rreth orës 08:30 të mëngjesit, për arsye ende të panjohura, Bashkim Mekolli vrau me sqepar dhe thikë gruan e tij 49-vjeçare, Demirkë Mekolli.
Çifti, i martuar prej rreth 18 vitesh, jetonte në shtëpinë e babait të autorit dhe ishin të pa punë. Vetë babai i Bashkim Mekollit, pak orë pas krimit, duke folur për gazetarët rrëfeu se çifti i bashkëshortëve kishin patur grindje prej kohësh.
Ai tha se i biri 49-vjeçar vuante nga depresioni dhe merrte ilaçe. Madje i moshuari shpjegoi se ai kishte ardhur në Tiranë për t’u shtruar, por mungesa e një karte shëndeti dhe sigurimeve shoqërore, kishte bërë që të kthehej mbrapsht vetëm me ilaçe.
“Prej kohësh vuante nga depresioni, prej shumë vitesh. Para dy muajsh, me rekomandimin e mjekut të fshatit vajti në Tiranë u vizitua. Donte të shtrohej, por nuk kishte kartë shëndeti dhe sigurime shoqërore. Morri barnat, i përdori për dy muaj. Ai nuk jetonte me mua, unë jetoj vetëm, pasi bashkëshortja më ka vdekur ka 14 vjet. Ai ishte në një shtëpi të braktisur andej, por prej një viti jetonte në shtëpinë time, i lëshova unë një dhomë, bashkë me të shoqen”, thotë ai, raporton tv Klan.
Kur pyetet sesi ndodhi ngjarja, Babai i Mekolli shprehet: “i gërricur ka qenë, me depresion ka qenë gjithmonë”.
Babai i 49-vjeçari rrëfen edhe se si e mori vesh krimin që kishte kryer i biri.
“Në mëngjes sa piva kafen dola në rrugë takova tim vëlla dhe vetëm kur erdhi nusja e nipit, hajdeni tha. Ai e kishte goditur me sqepar nga prapa. Kur erdha unë e gjeta me sqepar dhe thikën në dorë. Në shtëpi nuk kishte asnjë njeri. Ngjarja ka ndodhur rreth orës 8 gjysmë të mëngjesit”, shton ai.
Më tej, ai zbulon dhe gjendjen e vështirë ekonomike në të cilën ata jetonin.
“Jetonin vetëm me një asistencë 30 mijë lekëshe dhe vetëm grindeshin. Aktualisht e ndihmoja unë me pensionin tim. Vetëm sherr e shamatë kishin, unë mendoj se ai ishte shumë me depresion, shumë agresiv. Nëse do të ishte shtruar dhe kuruar atje mund edhe të qetësohej. Nuk ishte shtruar në spital, vetëm se kurohej me ilaçe të depresionit“, rrëfen më tej babai i 49-vjeçarit.
Çifti Mekolli kishte një djalë, rreth 16 vjeç, i cili jeton në Itali. Në momentin e krimit, në shtëpi nuk ndodhej njeri tjetër. Bashkim Mekolli u arrestua pas krimit dhe pritet që dëshmia e tij të zbardhë dhe shkaqet që çuan në këtë ngjarje të rëndë. / tesheshi.com/
