Gjykata e Krimeve të rënda vendosi ta lërë në burg të dyshuarin kryesor deri më tani për atentatin e së premtes të mbikalimi i Shkozetit, ku u qëllua ndaj një makine ku ndodhej prokurori Arjan Ndoja e Landi Muharremi, një figurë e krimit në zonë.
Kështu, Redjan Rraja, me profesion stomatolog, i afërm i deputetit Rrahman Rraja, do vijojë të hetohet në kushte qelie në funksion të zbardhjes së një prej krimeve që ku aludohet se janë kokolepsur shumë interesa.
Para se të ndodhte atentati, kryeministri Rama e cilësoi Ndojan si “prokuror të bandave”. Ndodhi kjo ndërsa ai linte në burg kreun e Kadastrës së Durrësit Ilirian Pula, për të cilin qeveria, më saktë zv/kryeministri Braçe, pretendoi se ai po ndëshkohej nga krimi për shkak se nuk i kishte njohur prona të paligjshme.
Redjan Rraja, i dënuar më parë vetëm me 8 muaj burg për fshehje pronash në krim (ishte në tavolinë me Elton Çiçon kur u ezekutua ky i fundit në një nga lokalet e Tiranës), e ka mohuar përfshirjen në atentat. Por akuza pohon se gjurmë të tij janë gjetur te automjetii braktisur i atentatorëve, të cilët nuk mundën ta djegin.
Pos kësaj, Rraja është arrestuar gjatë tentativës për t’u larguar drejt Malit të Zi, me arsyetimin se po shkonte në Itali për një çështje personale. /tesheshi.com/
