Shefi i Shtabit të Përgjithshëm, gjeneral Jeronim Bazo deklaroi se rrethanat e rrëzimit të helikopterit janë ende të pazbardhura.
Gjeneral Bazo theksoi se në bordin e helikopterit tip “EC 145” ndodhej një ekuipazh prej 3 vetësh, të përbërë nga kapiten Florian Deliaj, toger Donald Hoxha dhe ushtari profesionist, Gerald Baramuça.
“Kapiteni Florian Deliaj dhe toger Donald Hoxha kanë humbur jetën, ndërsa ushtari Gerald Baramuça po trajtohet në Spitalin Rajonal të Shkodrës, ku ndodhet jashtë rrezikut për jetën”, ka deklaruar Bazo.
Kreu i Forcave të Armatosura deklaroi gjithashtu se ka nisur një hetim mbi ngjarjen dhe shtoi se helikopterët “EC 145” sapo janë marrë nga Forcat e Armatosura shqiptare për të shërbyer si mjete shpëtimi dhe i janë nënshtruar të gjitha kontrolleve të parashikuara.
“Itinerari i fluturimit të këtij helikopteri ishte brenda trajektores së miratuar gjatë një fluturimi stërvitjeje rutinë”, deklaroi shefi i shtabit të përgjithshëm.
Për sa u takon dy pilotëve që humbën jetën, general Bazo theksoi se “ata ishin trajnuar brenda dhe jashtë vendit dhe kishin një eksperiencë të kënaqshme”. /tesheshi.com/
