Shqiptarët e Luginës së Preshevës do të krijojnë në fundjavë Asocacionin e tyre të Komunave siç kanë bërë serbët e veriut të Kosovës.
Qëndrimi në fakt ka ardhur edhe pas standardit që Tirana zyrtare i ka kërkuar Beogradit, kur Edi Rama vizitoi Serbinë. Standard sipas të cilit shqiptarët e Luginës duhet të trajtohen njëjtë siç trajtohen serbët në Kosovë.
Kryetari i Komunës së Preshevës, Ragmi Mustafa, ka deklaruar gjatë një interviste për KTV-në se të shtunën do të shpallet Asocacioni dhe për këtë vendim ata kanë informuar Kosovën, Shqipërinë dhe bashkësinë ndërkombëtare, por jo Serbinë.
“Me Beogradin nuk jemi konsultuar, sepse e dimë qëndrimin e tyre. Ne jemi në kontakt më Qeverinë e Republikës së Kosovës, asaj të Shqipërisë dhe me bashkësinë ndërkombëtare. Përkrahja e tyre do ta vë Beogradin në atë pozitë, që duhet ta pranojë këtë hap tonin”, ka thënë Mustafa.
Ai pohoi se Prishtina duhet të kushtëzojë funksionimin e Asociacionit të Komunave Serbe në Kosovë me lejimin e funksionimit të Asociacionit të Komunave Shqiptare në Serbi. Sipas Mustafës, ky është hapi i parë drejt arritjes së qëllimit të shqiptarëve të Luginës për t’u shkëputur nga Serbia dhe për t’iu rikthyer Kosovës. /tesheshi.com/
