Vendimi i sotëm i Komisionit Qendror të Zgjedhjeve për certefikimin e rezultateve të zgjedhjeve lokale të 21 qershorit nuk ka qenë lajmi: ai ishte në fakt vota pa asnjë hezitim i përfaqësuesve të opozitës për t’i vënë vulën procesit të zgjedhjeve vendore.
Me shtatë vota pro, pra edhe të përfaqësuesve të PD-së zgjedhjet e 21 qershorit mund të quhen të mbyllura si një proces i rregullt pa asnjë ankimim serioz në KQZ dhe Kolegj.
Kjo votë në fakt, të shtyn në një analizë, pasi ka qenë ish-kryeministri Sali Berisha më shumë, por edhe kryetari i PD-së, Lulzim Basha, që e kanë quajtur procesin zgjedhor si të manipuluar.
Madje Partia Demokratike, ka nisur edhe një betejë në Europë, konkretisht në Partinë Popullore Europiane për të përgatitur një rezolutë që të delegjitimojë procesin e zgjedhjeve lokale.
Por votimi në KQZ, në mesditën e sotme, është një tregues për një qëndrim konstruktiv të opozitës, i cili sipas gjasave do të vazhdojë edhe në sezonin parlamentar që nis në tetor.
Madje kohëve të fundit janë shtuar zërat edhe për një “koalicion të madh” me PS-në për realizimin e reformave të mëdha.
Këtë tezë në fakt, nuk e ka ngritur as më pak e as më shumë, por një nga drejtuesit e opozitës, siç është kryetari i Partisë Republikane, Fatmir Mediu.
Mbledhja e sotme e KQZ-së nuk ka patur debate, por është karakterizuar nga batutat e përfaqësueve të PS-së dhe PD-së, Genc Gjonçajt dhe Njazi Kosovrastit.
KQZ-ja vendosi që 46 parti politike që garuan në këto zgjedhje duhet të kthejnë fondet e përfituara, kurse 15 parti të tjera do të përfitojnë fonde shtesë.
Në KQZ u hodh edhe shorti për 22 ekspertët kontabël të cilët do të auditojnë fondet e shpenzuara nga subjektet politike.
Pas mbledhjes, kryetarja e KQZ-së, Lefteri Luzi, tha: “Kontribuam për një proces zgjedhor me standarde. Organizuam zgjedhje të lira dhe të gjithëpranuara. Kemi punuar intensivisht para se të dekretohej data e zgjedhjeve. Procesi i numërimit përfundoi brenda 4 ditëve dhe ky fakt tregon përgjegjshmërinë e komisionerëve”.
/tesheshi.com/
