Athina tashmë e tha dhe zyrtarisht me gojën e Ministrit të Jashtëm, Nikos Kotzias, i cili vizitoi për herë të parë Kosovën në mënyrë protokollare.
Kotzias deklaroi në një konferecnë për shtyp me homologun e tij Hashim Thaçi se Athina zyrtare është duke kërkuar hapësirën dhe kohën e nevojshme për të zyrtarizuar njohjen e pavarësisë së Kosovës.
Vizita e Kotziasit përbën vizitën e parë të një zyrtari të lartë të Greqisë në Kosovë. Pas takimit me kryeministrin e Kosovës, Isa Mustafa dhe zëvendëskryeministrin dhe ministrin e Jashtëm Hashim Thaçi, kryediplomati grek tha se e ka ftuar homologun e tij në Athinë për të hapur Zyrën e Kosovës.
Madje ai tha se nëse ka nevojë atë zyrë do ta lejojë edhe afër zyrës së tij në Ministrinë e Jashtme të Greqisë.
“Jemi duke e mbështetur Kosovën, jemi duke bërë më të mirën për Kosovën, që të bëhet anëtare e INTERPOL-it dhe UNESCO-së dhe do ta mbështesim këtë në të gjitha mënyrat. Po ashtu jemi duke mbështetur që të krijojmë marrëdhënie politike mes BE-së dhe Kosovës dhe kurdo që nevojitet i ofrojmë Kosovës ekspertizën dhe kapacitetet tona, ashtu siç i quaj unë, përvojën tonë sa i përket bashkëpunimit si vendi me i vjetër i BE-së në rajon. Jemi të hapur. Ndërsa, sa i përket çështjes së njohjes është se duhet t’i kemi parasysh dy kritere sa i përket kësaj çështje, njëri prej tyre është nevojat e gjithë rajonit dhe e dyta është interesi ynë kombëtarë europian. Në të ardhmen duhet të shohim se çfarë lloj aplikimi do të gjejmë për këto dy kritere”, tha Nikolaos Kotzias ministër i Punëve të Jashtme të Greqisë.
Kryediplomati grek po ashtu tha se popujt e Ballkanit duhet të shohin nga e ardhmja pasi sipas tij në këtë rajon prodhohet histori më shumë se mundësia për konsum të saj.
Zëvendëskryemistri kosovar, Hashim Thaçi tha se vizita e parë e një krydiplomati grek në Prishtinë është konfirmim i forcimit të bashkëpunimit mes dy vendeve, ndërsa paralajmëroi se së shpejtoi do të vizitojë Greqinë.
“Ne diskutuam me ministrin për bashkëpunimin tonë bilateral, që do të afirmohet dhe do të avancohet çdoherë e më tepër, për rolin pozitiv dhe të rëndësishëm që Greqia ka luajtur në rajon, për paqen, për stabilitetin, për bashkëpunimin mes vendeve por edhe për perspektivën euroatlantike. Do të kemi vizita edhe në Athinë por edhe në Prishtinë dhe e theksova, do të afirmojmë institucionalizimin e raporteve mes Kosovës dhe Greqisë”, tha Thaçi.
Thaçi tha se vendet e rajonit të Ballkanit, pavarësisht të kaluarës së errët që kanë pasur mes vete, tani po bëjnë garë se kush më parë të plotësojë standardet dhe të bëhet pjesë e NATO-s dhe e Bashkimit Europian. /tesheshi.com/
