“Tani ende jemi në bisedime”, tha sonte ministrja kosovare e Dialogut, Edita Tahiri, duke folur nga Brukseli, ku sot po mbahet një takim në nivel teknik e nesër delegacionet e Kosovës dhe Serbisë zhvillojnë raundin e 28-të të dialogut të nivelit të lartë kryeministror.
Në tavolinë bisedimesh të kryeministrave Isa Mustafa e Aleksandar Vuçiç përsëri do jenë katër çështje të diskutuara edhe në dy raundet e kaluara, në 23 dhe në 29-30 qershor: Parimet themelore për Asociacionin e komunave me shumicë serbe, kodi telefonik, energjia dhe ura mbi lumin Ibër në Mitrovicë.
“Ka pasur përparime në përafrimin e qëndrimeve për çëshjten e Asociacionit dhe mund t’ju siguroj se të gjitha përparimet janë në pajtim të plotë me Kushtetutën dhe ligjet e shtetit të Kosovës”, tha ministrja Tahiri.
“Ne do të pajtohemi me një marrveshje, e cila nuk i jap kompetenca ekzekutive Asociacionit dhe nuk do të jetë niveli i tretë i pushtetit ekzekutiv”, vijoi ajo.
E pyetur se, a do të këtë nesër marrëveshje, ministrja Tahiri tha se, “gjerat janë zhvilluar mirë sot”. “Unë besoj se mund të ketë edhe rezultate konkrete”, u shpreh ajo në një intervistë të drejtpërdrejtë televizive pak më parë. /tesheshi.com/
