Katër raste të gjetjes së mjeteve shpërthyese janë raportuar në Policinë e Kosovës në 24 orët e funit.
Mjetet shpërthyese janë hasur nga banorët në fshatin Zhegër të Gjilanit gjatë pastrimit të shtratit të lumit, në Dimcë të Ferizajt në pyll, në Zhur të Prizrenit në oborrin e shtëpisë dhe në qytetin e Vushtrrisë në një nga rrugët.
Njësitet për deminim të FSK-së kanë larguar apo asgjësuar në mënyrë të kontrolluar mjetet shpërthyes, pa incidente.
Në Kosovë, në raportet e Policisë, rastet e gjetjes së mjeteve shpërthyese janë thuaja të përditshme.
Shumë mjete shpërthyese të pashpërthyera, përfshirë zonat e minuara nga forcat serbe, kanë mbetur që nga lufta e para mëse 16 viteve.
