Kosova po punon për të përmirësuar furnizimin me ujë dhe energji elektrike dhe për të forcuar sigurinë në lokacionet strategjike pasi një shpërthim dëmtoi një kanal që dërgon ujë në dy termocentralet e saj kryesore, një incident që Prishtina e ka cilësuar si një “akt terrorist” për të cilin akuzoi Serbinë.
Por ministri i Jashtëm serb Marko Gjuriç hodhi poshtë ato që ai i quajti “akuza të pabaza” për përfshirjen e Beogradit dhe për më tepër tha se përgjegjëse për shpërthimin ishte qeveria e kryeministrit të Kosovës, Albin Kurti.
Kjo ndodh pasi në veri, një pakicë serbësh e jo shumica, dirigjohen nga Beogradi për të cenuar çdo lloj normaliteti dhe çdo lloj integrimi të tyre në institucionet dhe shoqërinë kosovare. Shpërthimi ka ndodhur rreth orës 19:00 të së premtes në afërsi të Zubin Potokut.
Këshilli i Sigurisë së Kosovës, i cili mbajti bisedime urgjente herët të shtunën, tha se forcat e tij të armatosura ishin aktivizuar për të parandaluar sulme të ngjashme. Siguria është rritur tashmë pas dy sulmeve të fundit në të cilat granata dore u hodhën në një stacion policor dhe një ndërtesë komunale në veri të Kosovës, ku jetojnë serbët.
“Këshilli i Sigurimit miratoi masa shtesë për të forcuar sigurinë rreth objekteve dhe shërbimeve kritike si urat, stacionet e transformatorëve, antenat, liqenet, kanalet,” tha Këshilli në një deklaratë.
Kryeministri Kurti akuzoi elementët kriminalë në Serbi për sulmin e së premtes.
“Ata që e kanë kryer këtë sulm nuk janë thjesht kriminelë ordinerë, këtë e bën një strukturë e mirëorganizuar që e di shumë mirë se mbyllja e ujit në atë lokacion do të ndikojë edhe në prodhimin e energjisë elektrike”, tha Arben Gjukaj, ish-drejtor ekzekutiv i kompanisë energjisë elektrike të Kosovës – KEK, duke shtuar se “situata është shumë kritike”.
Një reporter i Reuters vizitoi vendin e shpërthimit, ku uji derdhej përmes një vrime në murin prej betoni të kanalit. Punëtorët instaluan një sërë tubash të mëdhenj për të eliminuar rrjedhjen. Furnizimi me energji elektrike duket se aktualisht funksionon, por në disa zona është ndërprerë furnizimi me ujë të pijshëm.
Ministri i Energjisë së Kosovës, Artan Rizvanolli, tha se është duke u koordinuar me industrinë elektrike shqiptare për të siguruar më shumë energji elektrike. Ajo shtoi se uji i pijshëm do të transportohet me kamionë në zonat e prekura. /tesheshi.com/
