Kosova nuk ka aplikuar që të jetë pjesë e Organizatës së Kombeve të Bashkuara për Arsim, Shkencë dhe Kulturë (UNESCO).
Ministri në detyrë i Punëve të Jashtme, Emanuel Demaj, ka dhënë arsyet e mosaplikimit në këtë organizatë.
Sipas tij, pengesë kanë qenë çështjet e brendshme, saktësisht mos miratimi i dy ligjeve, atij për Liritë Fetare si dhe Ligji për Trashëgimin Kulturore.
Demaj ka hedhur poshtë pohimet se ka munguar mbështetja nga shtetet anëtare. Madje kryediplomati kosovar thotë se Serbia nuk ka pasur gisht në mosaplikim.
“Kosova nuk ka aplikuar në UNESCO akoma. Jemi në pritje të miratimit të dy ligjeve Ligjin për Liritë Fetare dhe Ligjin për Trashëgimin Fetare të cilat ende nuk kanë kaluar. Jemi duke punuar, po shohim të gjitha mundësitë dhe opsionet, besoj që kemi edhe pak kohë për të aplikuar dhe do të shohim si do të shkojnë rrjedhin gjërat”, ka deklaruar shefi i diplomacisë për “EkonomiaOnline”.
Mos konstituimi i Kuvendit, sipas Demajt, do të pamundësojë miratimin e këtyre dy ligjeve e në të njëjtën kohë edhe mos aplikimin për këtë vit.
“Pa miratimin e këtyre dy ligjeve nuk mund të lëvizim, nuk mund të aplikojmë, nëse nuk mundemi këtë vit, e lëmë për vitin tjetër”, sqaroi ai.
Në mungesë të tri votave, Kosova dështoi të anëtarësohej në organizatën më të madhe të Kombeve të Bashkuara UNESCO, në nëntor të viti 2015, proces të cilin e pengoi Serbia. Sesioni i 21-të i Asamblesë së UNESCO-s do të mblidhet në nëntor në Paris.
Për t´u pranuar, Kosovës i duhet dy të tretat e votave të 195 vendeve anëtare. /tesheshi.com/
