Shefi i shtatmadhorisë amerikane Joe Dunford ndodhet në Seul në Korenë e Jugut për të diskutuar situatën në rajon para se sistemi amerikan i mbrojtes me Raketa të vendoset plotësisht në gadishullin Korean.
Ai u takua me presidentin e Koresë së Jugut Moon Jai-In, por tha se “nuk folën rreth një afati konkret” për instalimin e plotë të sistemit.
Sistemi mund të shmangë raketat balistike me rreze të shkurtër dhe të mesme veprimi.
Presidenti koreano-jugor mësohet se ka kërkuar ndihmën e Shteteve të Bashkuara në parandalimin e një lufte në gadishullin korean duke vënë theksin tek një zgjidhje diplomatike për krizën.
Sipas Dunford, ky është prioriteti i Shteteve të Bashkuara, por pa përjashtuar as opsionin ushtarak.
Ai nxiti Veriut të ndalojë provokimet dhe retorikën armiqësore, pasi një luftë në gadishull, si ajo e viteve 1950-1953 i kushtoi jetën miliona personave dhe përçau gadishullin.
Zhvillimet vijnë në një kohë kur nga Peniani, Koreja e Veriut, erdhën kërcënime për luftë.
Testet më të fundit bërthamore të Penianit nxitën presidentin Donald Trump të paralajmëronte për një përgjigje të furishme ndaj Koresë së Veriut. Sipas tij, Shtetet e Bashkuara janë gati për luftë pas kërcënimeve se Veriu do të sulmonte territorin amerikan të Guamit. Retorika e ashpër e përdorur nga të dy palët ka çuar në një përshkallëzim të tensionit në rajon./tesheshi.com/
