Shumë prej nesh e konsumojnë kafenë për t’u kthjellur në mëngjes, dhe tani, një studim i ri na ofron edhe një arsye më tepër për ta pirë këtë pije stimuluese; ajo mund ta ulë rrezikun nga kanceri i lekurës melanoma.
Ky studim, i udhëhequr nga hulumtues të Institutit Kombëtar të Kancerit në Institutin Kombëtar të Shëndetit dhe Shkolla e Yale-it e Shëndetit Publik në Universitetin e Yale-it në New Haven, Connecticut, është publikuar në Revistën e Institutit Kombëtar të Kancerit.
Në SHBA vërtet që ka shumë konsumues të kafesë; më shumë se gjysma e popullatës pi mesatarisht 3.1 filxhan kafe në ditë. Dhe nuk është çudi duke pasur parasysh gjithë dobitë shëndetësore që janë ndërlidhur me këtë pije në të kaluarën.
Vitin e kaluar, Medical News Today ka raportuar për studime të cilat, mes tjerash, e ndërlidhin konsumimin e kafesë me uljen e rrezikut nga vdekja prej cirrhosisit të mëlçisë, me uljen e rrezikut nga diabeti i tipit 2 dhe uljen e rrezikut nga tinnitusi.
Sipas hulumtuesve studimet e kaluara kanë treguar se konsumimi i kafesë mund t’i mbrojë njerëzit nga kanceret e lëkurës, përveç melanomas, mirëpo nuk ishte e qartë se çfarë ndikimi ka konsumimi i kësaj pijeje te kanceret e lëkurës melanoma.
Sa më i madh konsumimi i kafesë aq më i vogël rreziku i prekjes nga melanoma
Hulumtuesit zbuluan se sa më shumë që pjesëmarrësit e këtij studimi konsumonin kafe aq më pak rrezikoheshin të prekeshin nga melanoma në periudhën vijuese. Ekipi hulumtues raporton se pirja e katër filaxhanëve kafe në ditë ka ulur rrezikun nga melanomas për 20%.
Ekipi hulumtues tregon se kjo lidhje është gjetur vetëm te pjesëmarrësit të cilët kanë konsumuar kafe me kafeinë, dhe jo pa kafeinë. Për më tepër, kafeja duhet se e ka ulur rrezikun nga melanoma malinjë, e jo nga melanoma in situ – ku qelizat e melanomas ende nuk janë shpërndarë përtej qelizave të jashtme të lëkurës.
Duke komentuar lidhur me gjetjet e tyre hulumtuesin kanë thënë: “Konsumimi më i madh i kafesë është ndërlidhur me një ulje modeste të rrezikut nga melanoma në këtë studim. Nevojiten hulumtime të mëtutjeshme të konsumimit të kafesë dhe përbërësve të saj, kafeinës në veçanti, me melanoman.”
Hulumtuesit kanë thënë se gjetjet e tyre nuk nënkuptojnë se njerëzit duhet ta rrisin konsumimin e kafesë për ta zvogëluar rrezikun nga kanceri. “Gjëja më e rëndësishme që njerëzit duhet të bëjnë për ta ulur rrezikun nga melanoma është që sa më pak t’i ekspozohen diellit dhe rrezeve ultravjollcë,” kanë thënë ata.
Megjithëse shumë studime i kanë dëshmuar efektet pozitive shëndetësore të konsumimit të kafesë, është e rëndësishme që të përmenden edhe dëmet e mundshme. Përbërësi kryesor i kafesë është kafeina, që është një stimulant i njohur. Mirëpo, konsumimi i tepërt i kafeinës mund të shkaktojë insomni (pagjumësi), shqetësim, irritim, monotoni, rrahje të shpejta të zemrës, dridhje të muskujve dhe mundime në bark.
Në vitin 2013, MNT ka raportuar për një studim të publikuar në Mayo Clinic Proceedings, ku thuhet se pirja e katër filxhanëve kafe në ditë mund ta rrisë rrezikun për vdekje të parakohshme.
