Ish-kreu democrat Berisha, pretendoi sërish konspirativisht “non grata”-n ndaj tij, jo atë amerikane por britanike.
Sipas tij, Soros e Basha janë pas vendimit të Londrës ndaj tij.
“Dokumentet e Home Office tregojnë tre burime: Burimi i parë është Fondacioni Shoqëria e Hapur e Sorosit. Burimi i dytë, mediat si BIRN, Balkan Insight, me sponsor super-spekulantin e botës, Soros. Burimi i tretë dhe i fundit janë akuzat e kundërshtarëve të mi politikë, Edi Rama, Erion Veliaj, Lulzim Basha”, tha Berisha.
Duke shpjeguar të trija një nga një, ai tha:
“Le të ndalem të fjalët që ka pranuar shprehimisht Home Office, të cilat të shastistin. Këto lidhje vijnë nga burime pa prova. Por, Home Office thotë se këto pranohen nga rasti i Fatjon Dautit, një njeri që nuk e kam takuar kurrë dhe nuk e njoh. Pak më vonë, Home Office shprehet se nuk ka qenë në gjendje të provojë se Berisha ka lidhje me Dautin. Janë të pabesueshme, por janë reale. Sa për dijeni, Fatjon Dauti është një mbështetës i PD-së dhe më shumë se mbështetës i Lulzim Bashës. Unë nuk e kam takuar kurrë”.
Sipas tij, rasti i dytë lidhet me Damir Fazlliç: “Sipas Home Office, e kam mbrojtur kur kanë dalë fakte për inkriminimin e tij. Burimet janë BIRN, Balkan Insight, Reporter.al të superspekulantit Soros. Fazlliç nuk ka qenë kurrë i inkriminuar në Shqipëri, SHBA apo ndonjë vend tjetër. Ndaj tij në Shqipëri nuk kanë dalë kurrë prova të veprimtarisë inkriminuese gjatë kohës që kam qenë kryeministër apo më vonë. Pas një hetimi të nisur nga Ina Rama, u gjet se Fazlliç nuk kishte shkelur asnjë ligj. Në një moment, kur po shkonte në aeroport, prokuroria kërkon arrestimin e tij pa lëshuar një urdhërarrest. Asnjë shtetas nuk mund të arrestohet pa urdhër. Kur prokuroria i kërkoi paraqitjen, ai erdhi dhe prokuroria konkludoi se ai nuk kishte shkelur asnjë ligj”.
Berisha vijoi duke thënë se “e treta, lidhja ime me bandat e Elbasanit. Burimi, Lulzim Basha. Edhe në këtë rast, ambasadori King-Smith ka përcjellë një shpifje të ish-kryetarit të PD-së. Ai në nëntor 2022 deklaroi se Berisha po mbledh firmat për mbledhjen e Kuvendit Kombëtar me ndihmën e Suel Çelës. Unë iu përgjigja, por korrupsioni të bën të vuash nga humbja e memories”.
Edhe sikur të gjitha ç’pretendon Berisha të qëndrojnë, ky është rasti që ndaj tij është bërë lehtësisht ajo që ai jua bën lehtësisht të tjerëve: akuzat fët e fët, pa u lodhur për prova. /tesheshi.com/
