Ministri i Drejtësisë, Abelard Tahiri, ka iniciuar plotësimin e ndryshimeven të legjislacionit që ndërlidhet me fushën e konfiskimit të pasurisë së paligjshme.
Këtë e ka bërë të ditur ministri Tahiri në hapjen e konferencës që po mbahet në Prishtinë në lidhje me menaxhimin e pasurive të sekuestruara dhe të konfiskuara.
“Ju jeni të informuar që unë në fillim të punës time kam filluar plotësimin e ndryshimit të legjislacionit që ndërlidhet me fushën e konfiskimit të pasurisë së paligjshme dhe në një të ardhme të afërt do t’ia drejtoj qeverisë këto ndryshime. Jam shumë i bindur që do të gjej përkrahjen edhe të deputetëve të Kuvendit të Kosovës që të miratojë këto ndryshime. Pra, sundimi i rendit dhe ligjit në Kosovë do të jetë fusha, do të jetë prioriteti i qeverisë dhe në këtë drejtim do të kemi angazhim maksimal”, tha Tahiri.
Sipas tij konkluzionet që do të dalin nga kjo konferencë do t’i integrojë në planin e punës në cilësinë e ministrit të Drejtësisë.
Tahiri tha se qeveria e Kosovës ka objektiv dhe prioritet luftën kundër krimit të organizuar dhe korrupsionit, ndërkohë që theksoi faktin se bashkëpunimi rajonal në luftën kundër krimit të organizuar është shumë i rëndësishëm.
“Ju jeni të informuar se pak ditë më parë është konsoliduar qeveria e re Republikës së Kosovës dhe kjo Qeveri objektiv dhe prioritet të saj ka luftën kundër krimit të organizuar dhe korrupsionit. Bashkëpunimi rajonal në luftën kundër krimit të organizuar dhe korrupsionit është jashtëzakonisht i rëndësishëm. Ballkani Perëndimor duhet edhe më tej të shtojë bashkëpunimin në luftën kundër kësaj dukurie negative. Pra, si Ballkan Perëndimor ne që të shndërrohemi në një aset të Bashkimit Evropian, duhet të fillojmë të mendojmë që të eksportojmë siguri dhe të mos jemi vend i trafiqeve ilegale”, tha ai./tesheshi.com/
