Ndërsa prej dy ditësh po merren masa të rrepta për mbarëvajtjen e ndeshjes Shqipëri-Izrael, kreu i Komunitetit Musliman Shqiptar, Skënder Bruçaj ka rikujtuar vlerat e shqiptarëve, të lartësuara prej vitesh, atë të mikpritjes dhe tolerancës fetare. Në një postim në rrjetin social facebook, ai shkruan se shqiptarët mbrojtën popullin hebre gjatë Luftës së Dytë Botërore, duke u renditur vendi i vetëm në kontinentin evropian, që strehoi numrin më të lartë të tyre. “Krenarë për popullin tonë ndër shekuj, që diti historikisht të ruante vlerat më të larta humane, atë të mikpritjes dhe tolerancës e harmonisë ndërfetare. Krenarë për të parët tanë myslimanë shqiptarë, besimtarë e bujarë, që strehuan mijëra hebrenj në shtëpitë e tyre gjatë Luftës së II-të Botërore, duke u bërë vendi i vetëm në Evropë, që kishte më shumë hebrenj pas lufte se para saj”, shkruan Bruçaj, pas masave të marrë nga autoritetet e rendit, për ndeshjen e Shqipërisë me Izraelin në “Elbasan Arena, që pritet të luhet nesër mbrëma.
Kreu i KMSH-së ka uruar një qëndrim të qetë të mysafirëve nga Izraeli dhe padyshim edhe një fitore të denjtë të ekipit kuqe e zi. “Sportistëve dhe mysafirëve nga Izraeli i uroj qëndrim të qetë e në paqe në token shqiptare! Dhe gjithashtu i uroj fitore kombëtares së mrekullueshme shqiptare, për të cilën jemi të gjithë krenarë!”, përfundoi Bruçaj./tesheshi.com
