Gara Auto Slalom “Prishtina 2017” e paralajmëruar të mbahet me 1 tetor është ndërprerë nga Komuna e Prishtinës. Shkaku i këtij vendimi është fushata elektorale.
Enver Kadriu, nga Drejtoria e Shërbimeve Publike, Mbrojtjes dhe Shpëtim, ka njoftuar se ky vendim është marrë pas takimit me nënkryetarin Muhedin Nushi dhe Drejtorin Gent Begolli.
“Lidhur me kërkesën e FASK për gara automobilistike për shkaqe të sigurisë, për shkaqe politike (fushata elektorale lokale) si dhe përkundër pëlqimit të dhënë nga Drejtoria e Kulturës, është vendosur që të mos jepet leja për këtë garë”, thuhet në njoftim.
Ndaj këtëij vendimi ka reaguar Federeata e Autosporteve, e cila e quan të padrejtë.
“Jemi jashtëzakonisht te indinjuar nga fakti qe Komuna e Prishtinës është e vetmja që pamundëson mbajtjen e garave automobilistike në ketë qytet prej dy vitesh. FASK është institucioni i vetëm i liçensuar nga Ministria e Kulturës Rinisë dhe Sportit dhe Federata Ndërkombëtare e Automobilizmit (FIA) për organizimin e aktiviteteve sportive të këtij lloji dhe kjo komunë zgjedh që për arsye politike të mohojë aktivitet sportive që si parim themelor kanë promovimin e sigurisë në rrugë.
Është fatkeqësi për vendin tonë që zhvillimi i sportit mohohet për arsye politike e kjo vjen nga Komuna e Prishtinës, e cila ka 4 klube pjesë të Kampionatit në Automobilizëm.
Sikurse vitin e kaluar që për arsye të pabaza si këto të sotshmet, komuna e Prishtinës mohon aktivitetet sportive dhe edhe njëherë i mohon klubeve saj të jenë nikoqire të garave automobilistike, e si çdo garë tjetër duhet të jenë mysafire në qytetet e ndryshme të Kosovës të cilat jo vetëm që lejojnë mbajtjen e garave por ofrojnë të gjithë gatishmërinë për organizimin sa më të mirë”, thuhet në reagim. /tesheshi.com/
