Ndërsa Europa është duke luftuar me krizën e shkaktuar nga migracioni, krahu ekzekutiv i Bashkimit Europian pritet të paraqesë këtë javë një plan për shpërndarjen e emigrantëve në 28 shtetet e bllokut. Lajmi u bë i ditur zyrtarisht ditën e sotme, ndërsa mendohet se plani do të hasë në rezistencën e disa prej qeverive anëtare të BE-së.
Dhjetëra mijëra emigrantë kanë rrezikuar këtë vit nëpërmjet kalimit të detit Mesdhe me varka e anije, çka ka sjellë dhe pasoja fatale në jetën e tyre. muajin e kaluar, një anije u përmbyt në Itali duke shkaktuar vdekjen e të paktën 900 personave.
“Propozimi për shpërndarjen e emigrantëve do të bazohet në një sistem të kuotuar çka do të mbajë parasysh faktorë si madhësia e popullsisë së një vendi, ekonominë e shtetit dhe nivelin e papunësisë”,- thuhet në deklaratën e Bashkimit Europian.
Plani, i cili nuk është përfunduar ende dhe që duhet të pranohet nga qeveritë e kombeve për të qenë i efektshëm, është mbështetur fuqishëm nga Gjermania.
Vendet në Europën Jugore janë ato që preken më së shumti nga mbërritja e refugjatëve, veçanërisht në Greqi, Itali dhe Maltë. Pikërisht këto shtete po kërkojnë ndihmën e shteteve të tjera për shpërndarjen e emigrantëve dhe për uljen e këtij lloj presioni të ushtruar mbi ta.
Presidenti i Komisionit Europian, Jean Claude Juncker ka argumentuar fuqishëm në favor të kuotave muajin e kaluar. “Ne duhet të shpërndajmë refugjatët në të gjithë Europën”,-tha ai në Parlamentin Europian.
Për shumë vend e të BE-së, politikat e azilit shikohen si çështje të sovranitetit kombëtar. Këto shtete kundërshtojnë përpjekjet e Brukselit për ti detyruar apo bindur për të marrë azilantët.
Kryeministri i Hungarisë, Viktor Orban tha në një intervistë për radion e shtetit të premten që lamë pas se “ideja se dikush lejon marrjen e refugjatëve dhe detyron edhe shtetet e tjera të bëjnë të njëjtën gjë është e padrejtë”. Ai bëri thirrje se duhet çrrënjosur trafikimi i qenieve njerëzore.
Muajin e kaluar, liderët evropianë u zotuan të trefishonin shpenzimet në mbrojtjen e kufirit dhe miratuan plane që të rriten përpjekjet për të bllokuar anijet me klandestinë. Kritikët dhe grupet e avokimit kanë kritikuar planet e Bashkimit Evropian si tepër të vogla në kuadër të shkallës e sfidës së emigracionit. /tesheshi.com/
