Dimitris Avramopulos, komisioneri europian për emigracionin, shprehu shqetësimin për rregullat e azilit ndërsa vizitoi Athinën dhe u takua me kryeministrin grek, Aleksis Cipras.
Numri i madh i emigrantëve që kapërcejnë Mesdheun për t’u ikur konflikteve dhe gjejnë strehë në Europë i ka vënë në mendime zyrtarët e lartë të BE-së, në kërkim të ndryshimit të rregullave ekzistuese të azilit.
Avramopulos pranoi se si Europa dhe Greqia janë të shqetësuara nga rregullat, dhe se ka një vetëdije të përgjithshme se diçka duhet të ndryshojë.
Greqia është një prej pritësve kryesorë në Europë të mijëra emigrantëve që kalojnë për çdo vit kufirin, dhe prej kohësh ka kërkuar një rishikim të “Rregullores së Dublinit”, sipas së cilës vendi i parë europian në të cilin vënë këmbë emigrantët është i detyruar të kujdeset për kërkesat e tyre për azil.
Nga ana e tij, kryeministri grek, Cipras, tha se BE-ja duhet ta shohë me vëmendje të madhe rishpërndarjen e pretenduesve për azil dhe të refugjatëve ekonomikë brenda territorit të saj.
Athina zyrtare ka kërkuar më shumë para nga BE-ja në vitet e fundit për ta përballuar dyndjen e azilkërkuesve nga vendet në konflikt, si nga Siria dhe Afganistani. /tesheshi.com/
