Komisari europian për negociata e zgjerim Johannes Hahn, sot ka thënë për mediet se janë të papranueshme deklaratat, kontraproduktive i ka quajtur ai, të disa liderëve në rajon për ndryshimin e kufijve.
Ndonëse nuk ua ka përmendur emrat, Hahn ka aluduar te deklarata e Ramës dhe te përsëritja e saj nga Thaçi se nëse “Bashkimi Evropian mbyll dyert për Shqipërinë e Kosovës, atëherë nuk përjashtohet mundësia e bashkimit të këtyre dy vendeve”.
Këto deklarata të krerëve shqiptarë janë quajtur të pamatura edhe nga diplomat dhe njohës të politikës shqiptare.
Ambasadori i SHBA-së në Kosovë, Greg Delawie, e ka cilësuar deklaratën e Thaçit si të “pakujdesshme”.
“Qeveria amerikane e mbështet sovranitetin edhe të Kosovës edhe të Shqipërisë. Ne jemi kundër bisedave të pakujdesshme për bashkim dhe të reagimeve të tepruara ndaj deklaratave të tilla, të cilat minojnë qëndrueshmërinë në rajon”, tha Delawie për radion “Evropa e Lirë”.
Ndërsa, ish-udhëheqësi i partisë së shuar, “Ora”, Veton Surroi është tallur me Ramën e Thaçin, duke thënë se “ideja e kërcënimit për bashkim është e krahasueshme kur një person kërcënon të zgjerojë dyfish shtëpinë, të cilën s’është në gjendje ta mbajë”.
Kurse Rexhep Qosja, në një postim në Facebook me titull “Deklarata kundërshtare pa përgjigje”, duke iu referuar një ragimi të Vuçiçit që thotë se “Shqipëria dhe Kosova mund të bashkohen vetëm me luftë”, akademiku bën thirrje që të reagohet ndaj kësaj deklarate. /tesheshi.com/
