Një komentator politik francez, i njohur për komentet e tij polemizuese mbi emigracionin dhe muslimanët, pretendon se ushtria franceze ka një plan sekret për t’i spastruar etnikisht muslimanët nga Franca me ndihmën e specialistëve ushtarakë izraelitë.
Eric Zemmour deklaron se sulmi mbi bashkësinë muslimane në Francë ka një emër, e se do të bazohet në fushatat e fundit izraelite kundër palestinezëve në Gaza.
Lajmin e bën të ditur britanikja Daily Mail në variantin elektronik, ku citon komentatorin francez t’i ketë deklaruar radios RTL se, “Shtabi i Përgjithshëm i Ushtrisë e di se do të vijë një ditë kur do duhet ta rifitojë atë që është bërë vend i huaj në tokën tonë.”
Gjithnjë sipas Daily Mail-it, Zemmour pohon se plani është në proces, duke shtuar, “Ai u çua përpara me ndihmën e specialistëve të ushtrisë izraelite, që u kanë përcjellë kolegëve francezë përvojën e tyre të Gazës. Çdokush po flet mbi krahasimin.”
Komentatori deklaron se ka dëgjuar për planin falë lidhjeve të tij me hierarkinë e ushtrisë franceze.
Zemmour është përballur me kritika të forta në rrjetet sociale, ku është krahasuar dhe me Gëbelsin, ministrin nazist të propagandës.
E përditshmja britanike thotë se nuk ka një reagim mbi pretendimet e Eric Zemmour-it nga ushtria franceze apo izraelite. /tesheshi.com/
