Këtë të mërkurë kanë nisur ndeshjet e dyta në grupe në Kupën e Amerikës. Në dy takimet e grupit A kanë fituar Kolumbia e SHBA-të.
Amerikanët e Jurgen Klinsmann-it kanë bërë një ndeshje krejt ndryshe asaj të parës, ku patën humbur ndaj Kolumbisë.
Fitorja 4-0 ndaj Kosta Rikës është më e thella në tërë sfidat e zhvilluara gjer tani në këtë veprimtari. Kostarikanët bënë një paraqitje të mirë vetëm në pesë minutat e para, për t’u shpërfytyruar në pjesën tjetër të lojës.
Tre prej golave të ekipit të SHBA-ve do të shënoheshin në pjesën e parë. Dempsey me 11-metërsh, e Jones dhe Wood e çuan rezultatin në 3-0 brenda 42 minutave. Goli i katërt, i realizuar nga Zusi, do të regjistrohej tre minuta para mbarimit të lojës.
Me këtë fitore, SHBA-të u ngjitën në vend të dytë në grupin A, me tre pikë pas dy ndeshjesh.
Pikë të plota në këtë grup ka vetëm Kolumbia, e cila mposhti 2-1 Paraguajin. Bacca ishte shënuesi i golit të parë, të pasuar nga një i dytë prej James Rodriguez-it. Paraguajanët do ta ngushtonin rezultatin në minutën e 71-të, me golin e Ayala-s.
James Rodriguez mbetet figura qendrore te skuadra kolumbiane, duke shënuar dy gola në dy takime.
Në orët e para të së enjtes do të luhen sfidat e dyta të grupit B, fillimisht, në 01:30, Brazil – Haiti, e më pas, në 04:00, Ekuador – Peru. /tesheshi.com/
