Fitorja e Ilia Stefos në Kolonjë nuk duhet marrë si një rezultat i thjeshtë lokal, pasi ka të dhëna të mjaftueshme për të analizuar një lëvizje të rëndësishme që nuk është thjeshtë aritmetike.
Dhe kjo bëhet thjesht duke marrë përbazë rezultatin e zgjedhjeve lokale të vitit 2015.
Në Kolonjë në zgjedhjet e para një viti, kandidat për kryetar bashkie ishte i propozuari nga LSI-ja, i ndjeri Arben Malo që ndërroi jetë pak muaj më përpara.
Në 21 qershor 2015, diferenca e Malos me kandidatin e PD-së Viktor Duro ishte 727 vota.
Malo mori 4,437 vota, ndërsa Duro 3,710 vota. LSI mori 259 vota kurse PS-ja 2443.
Ndërkaq, në zgjedhjet e djeshme Ilia Stefo mori 5136 vota ndërsa Dritan Hajro me 3035 vota, pra 2100 vota më shumë.
Dhe këtë diferencë jo më kot e ka anonçuar vetë Edi Rama në një postim në FB.
“Faleminderit Kolonja për besimin e madh.Urime Ilia Stefos. Superfitore +2101 vota (+727 në 2015) janë një inkurajim e detyrim i madh për ne”, shkruan Rama në një status.
Po kujt ia përcjell këtë mesazh-karshillëk Rama? Kundërshtares klasike, PD-së? E pse kur dihej që fitorja ishte e sigurt, edhe për faktin se vetë selia blu nuk kishte pretendime, sa që garën ia la një përfaqësuesi të Agron Dukës së Partisë Agrare?
Mesazhi është adresuar gjetiu, referuar precedentit Dibër: tek LSI-ja! Edi Rama e ka lëshuar këtë sinjal politik për të treguar se bëhet fjalë për një fitore të pastër ku aleati Ilir Meta nuk u investua fare në Kolonjë, dhe ishte pra në të njëtën pozitë si në bashkinë Dibër.
Dhe në të dy rastet që ishin test para 2017-ës si në Dibër ashtu edhe në Kolonjë, PS fitoi thellë.
Duket theksuar padyshim se zgjedhjet lokale në mes të mandatit i shkojnë pushtetit, por jo përjashtueshmërisht, gjithsesi shifrat shërbejnë për matje të sinjaleve dhe temperaturave politike.
Dhe vetë Edi Rama kërkoi jo referendum “me qeverinë apo kundër” por ka kërkuar që elektorati të japë një sinjal politik për zgjedhjet e 2017-s.
E tha qartë kryeministri në mitingun mbyllës të premten. “Dilni të gjithë në votime edhe ata që s’kanë votuar, dhe çdo votë abstenim është votë kundër nesh dhe për kundërshtarët tanë”. Pra Rama thirri për referendum politik që përkthehet me aleancën e pashpallur PD-LSI apo me atë PS-PDIU. Dhe referendum, duke u nisur nga shifrat ka ndodhur.
Realisht ka ndodhur në një zonë të lehtë për Partinë Sopcialiste, një bastion që kurrë, asnjëherë nuk ka votuar djathtas. Por që në këtë klimë kur e majta po vuan përplasje turbulente, me daljen e Partisë së Blushit por edhe përgatitjen e Ilir Metës për largim, do të duhet të reflektohej disi në zgjedhjet e së dielës.
Gjithsesi duhet thënë se Kolonja nuk duhet marrë si një etalon politik.
Por si një test sado i vogël nuk ka sesi mos të gjykohet. Pasi politika në fund të fundit provën reale të vet e jep në zgjedhje.
Dhe dje u zhvilluan një palë zgjedhje edhe jo të vogla, që në të gjithë botën analizohen mesazhet politike që vijnë prej tyre. /tesheshi.com/
