Lumi Siena është mbushur dhe ka arritur në nivelin e 4.9 metrave në Paris. Ky është niveli më i lartë që prej vitit 2001. Në alert është vendosur i gjithë departamenti i Seine-et-Marne, në qendër të kryeqytetit, ku ndodhet një pjesë e madhe dhe e dendur e popullsisë franceze.
“Niveli i Sienës do të rritet ende gjatë orëve në vijim”, – thonë ekspertët, të cilët parashikojnë një nivel prej 5.6 metrash ditën e nesërme. Një gjë e tillë nuk ka ndodhur që prej vitit 1992. Që prej ditës së hënë e deri më tani është ndërhyrë në 10 mijë raste dhe 5 mijë persona janë evakuuar.
Tragjedia më e madhe si pasojë e motit të keq të këtyre ditëve është regjistruar në Bavari, ku në qendrën Simbach am Inn, tre persona janë gjetur pa jetë, të ngecur në banesat e tyre. Një viktimë tjetër është regjistruar në afërsi të një përroi.
Policia gjermane ka bërë me dije se ka gjetur trupin e një viktime të pestë në Bavari, në një zonë pranë me kufirin austriak. Bëhet fjalë për një burrë të gjetur po në Simbach am Inn. Një tjetër grua ka humbur jetën mbrëmjen e djeshme në rrethinat e Julbach. Niveli i ujit është duke u ulur ndërsa policia ka lajmëruar se disa rrugë do të vijojnë të rrinë të mbyllura.
Një grua 86-vjeçare është gjetur e mbytur në shtëpinë e saj në Seine-et-Marne të Francës, i cili është një ndër departamentet franceze të goditura më rëndë prej aluvioneve. Trupi i gruas u gjet nga zjarrfikësit në shtëpinë e saj në Souppe-sur-Loing, në jug të Parisit. /tesheshi.com/
