Nga Blendi Gashi
Vetëvendosje dhe LDK-ja nga përfundimi i zgjedhjeve të 11 qershorit kanë nisur takimet me qëllim që të përafrojnë qëndrimet për një koalicion të përbashkët, nëse PAN, me në krye Veselin e Haradinajn, nuk do të arrijë të krijojë qeverinë e re.
Për të afruar dallimet e mëdha që kanë këto parti dhe përafruar programin e mundshëm qeverisës janë mbajtur disa takime por deri tani nuk ka ndonjë rezultat që mund të përmendet.
Edhe pse përfaqësues të dy subjekteve deklaronin se po bëjnë të pamundurën për të lënë anash të kaluarën me synim që ta largojnë PDK-në nga pushteti, papritmas kandidati i LDK-së për kryeministër Avdullah Hoti befasoi VV-në duke thënë se nuk bëjnë koalicion me të, pa kërkuar falje për sulmin ndaj eskortës së kryeministrit Isa Mustafa dhe shtëpisë së tij, që u bë në kohën e protestave opozitare.
Por kërkimi i faljes nga Vetëvendosje është vetëm hapi i parë që e bën të vështirë bashkëpunimin mes dy partive, pasi VV ka deklaruar se nuk ka pse t’i kërkojë askujt ndjesë për veprimet e bëra në mbrojtje të shtetësisë dhe territorit.
Megjithatë problemi më i madh për një bashkëpunim VV-LDK nuk është kërkimi faljes, por 70 dosjet e ngritura për korrupsion nga Vetëvendosje e Prishtinës ndaj Isa Mustafës, kur ky i fundit udhëhoqi kryeqytetin.
Dhe është pikërisht Mustafa që së fundmi bashkëpunimin me VV-në e ka lidhur pikërisht me dosjet e ngritura ndaj tij.
Kreu i LDK-së ka vënë disa “kushte” për një bashkëpunim me partinë e Visar Ymerit për çka ka thënë prerë se ajo duhet të tregojë nëse dosjet e dërguara në prokurori janë të vërteta apo kanë bërë propagandë.
“Sa i përket Vetëvendosjes kemi disa çështje që duhet t’i sqarojmë dhe pastaj të bëjmë partneritet. Ata duhet të sqarojnë pozicionet e tyre si parti. Në qoftë se dikush ka dërguar 72 dosje në prokurori për mua, atëherë ata duhet të deklarohen a janë të vërteta apo vetëm kanë bërë propagandë. Mua asnjëherë nuk më ka thirrur Prokuroria. Atëherë si të bëjmë koalicion me një parti kur nuk e dimë se çfarë do të ndodhë me demarkacionin, shndërrimin e FSK-së në ushtri, ekonominë”, ka deklaruar Mustafa.
Po ashtu mbetet e prerë se lufta ndaj korrupsionit është prioritet i tyre dhe se pavarësisht kush janë përgjegjësit për një akt të tillë duhet të japin përgjegjësi për dëmet që i kanë shkaktuar vendit.
“Qeverisja e Lëvizjes Vetëvendosje në Prishtinë ka depozituar në prokurori mbi 70 dosje që kanë të bëjnë me keqpërdorimet në Komunën e Prishtinës. Ne presim që secila prej tyre të hetohet dhe gjykohet madje presim një angazhim të prokurorisë në këtë drejtim”, ka thënë Haxhiu, duke shtuar se VV në Prishtinë, një prej punëve më të mira që ka bërë është ndalja dhe lufta ndaj korrupsionit.
Nga deklaratat e mësipërme shihet qartë se 70 dosjet ndaj Mustafës padyshim që pritet të jenë pengesa kyçe që LDK të lidhë koalicion me VV-në.
Arsyeja është se VV në asnjë mënyrë nuk do të pranojë atë që thotë Mustafa se kanë bërë propagandë me dosjet e ngritura, pasi do të dëmtoheshin jashtëzakonisht shumë dhe askush më nuk do i merrte seriozisht në luftën anti-korrupsion, ndërsa vështirë se edhe mund t’i tërheqë ato edhe nëse ky do ishte kushti kryesor i LDK-së për të lidhur koalicion qeverisës me vetëvendosësit.
Pra koalicioni eventual është plotësisht në duart e Mustafës dhe varet prej tij nëse do lërë pas inatet me vetëvendosësit dhe do t’i hapë dritën jeshile partisë që të bashkëqeverisi me VV-në, duke çuar në opozitë PDK-në e Kadri Veselit, që e rrëzoi nga posti i kryeministrit.
Megjithatë një gjë është e sigurt. Nëse Mustafa “dorëzohet” dhe pranon bashkëqeverisje me VV-në pavarësisht nëse kjo e fundit nuk heq dorë nga 70 dosjet, atëherë do të zgjedhë Albin Kurtin në pushtet, jo pse ia do zemra, por vetëm për inat të PDK-së, që të çojë në opozitë Kadri Veselin. /tesheshi.com/
