KMDLNj për të mbrojtur ministren Bajramin sulmon ambasadorin e BE-së

KMDLNj i ka dalë në mbrojtje ministres Hykmete Bajrami, e cila ishte akuzuar nga përfaqësuesi i BE-së Samuel Zhbogar për spastrime në administratën e ministrisë që drejtohet nga znj. Bajrami. KMDLNj vlerëson së është duke shprehur një kërcënim ndaj një punonjësi të Qeverisë. Sipas KMDLNj,  ministrja Bajrami po deklaron se po e lufton korrupsionin sikur edhe dukuritë e tjera negative të përbërjes së mëparshme të kësaj ministrie. Fjalori që e përdor z. Zhbogar është një kërcënim i ambalazhuar me “shqetësimin” e tij për mbarëvajtjen e punës në këtë ministri dhe pa asnjë dyshim paraqet kërcënim të hapur ndaj ministres Bajrami që për çdo vend normal do të ishte e papranueshme dhe ndërhyrje flagrante në punën e një përfaqësuesi të Qeverisë.
E më këtë rast KMDLNj thekson se janë prekur interesat e dikujt që e ka gëzuar apo ende e gëzon mbrojtjen e ndërkombëtarëve të cilët, ndoshta edhe kanë ndikuar në emërimet e mëparshme për poste të larta institucionale. Ndryshe, pse do të duhej t’i pengonte zotit Zhbogar përpjekja dhe angazhimi i ministres Bajrami për të vendosur rregull në këtë ministri. Dyshimet për shpërdorime për të cilat ministrja Bajrami ka pretendime konkrete duhet të hetohen, thekson KMDLNj. Po ashtu ky këshill e këshillon Zhbogarin se duhet ta ketë të qartë se nëse dikush largohet nga puna pa të drejtë apo degradohet në aspektin profesional pa arsye, ekzistojnë mekanizma për mbrojtjen e tyre siç janë: Këshilli i Pavarur Mbikëqyrës, Inspektorati i Punës si dhe gjykatat (në të gjitha nivelet) ku mund të kërkojnë të drejtën e tyre për shkak të një veprimi arbitrar të ministres apo dikujt tjetër me përgjegjësi nga kjo ministri. Më tej KMDLNj thotë se Zhbogar duhet të angazhohet për forcimin e pavarësisë së institucioneve të pavarura (që u përmendën më lartë) e jo të ndërhyjë në punën e ministres Bajrami sepse në rastin konkret po del të jetë shumë i anshëm dhe paragjykues; në njërën anë i merr në mbrojtje zyrtarët e ministrisë së mëparshme që i kategorizon si “profesionistë” ndërsa në anën tjetër e pengon dhe kërcënon ministren Bajrami se po i zëvendëson “profesionistët” me joprofesionistë. Çka dhe kënd në fakt po e mbron z. Zhbogar dhe pse po e bënë këtë në vend se ta përkrah këtë ministri e cila është shumë e rëndësishme për sigurimin e mirëqenies për qytetarët e Kosovës mbetet të shihet por duhet të respektohet ndarja e pushteteve dhe kompetencave , z. Zhbogar duhet ta bëjë punën sipas mandatit që e ka sikur që edhe ministrja Bajrami nuk duhet të pengohet që ta bëjë punën e saj gjithashtu në përputhje me mandatin që i takon, thuhet në reagimin e KMDLNj-së./tesheshi.com/