Nga Donat Maloku
Gjatë luftës së Kosovës në vitin 1998, fshati Kijevë i Komunës së Malishevës ishte cilësuar si “vendi më i rrezikshëm në Evropë” nga ambasadori amerikan Richard Holbrooke. Në të dy anët e Kijevës qëndronin në istikame forcat e UÇK-së, kurse në mes ndodhej ushtria dhe policia e blinduar serbe. Popullata shqiptare dhe një pjesë e vogël e popullatës serbe i nënshtrohej një rreziku të madh. Deklarata e Holbrook-ut dhënë në atë kohë tërhiqte vëmendjen e opinionit ndërkombëtar për katastrofen që mund t’u ndodhte banorëve të kësaj qyteze…
Kijeva është një qytezë jo vetëm me një perspektivë për të ardhmen, por edhe një vend i pleqnarëve të njohur, ku bëhej pajtimi i gjaqeve, zgjidheshin ngatërresat e lloj çështjesh civile e penale pa pasur të nevojë të ndërhyjë dora e shtetit.
Është një qytezë që lidh qendra të rëndësishme komunale, Drenicën me Llapushën e Dukagjinin. Është një rajon ku spikasin histori të shumta të së kaluarës së lavdishme, një rajon që ka potenciale zhvillimi ekonomik, turistik e kulturor.
Kijeva është banuar edhe nga një popullatë serbe, e cila pas luftës është larguar e gjitha nga aty. Fshati në fakt sipas banorëve e ka pasur disa herë statusin e komunës në histori, “ka qenë komunë edhe shumë para Malishevës”. Kijevasit e mbajnë mend kur rreth vitit 1910 kryetar komune në Kijevë ishte bashkëvendësi i tyre, Kajtaz Ramadani, emrin e të cilit aktualisht e mban shkolla fillore dhe e mesme e ulët e këtij fshati.
‘Kërkesa për t’u ribërë Komunë’
Banorët e Kijevës në vitin 2014-të themeluan Grupin Nismëtar për ribërjen e fshatit të tyre Komunë. Jo vetëm banorët e Kijevës kishin shprehur përkrahjen e tyre iniciativën e ndërmarrë, por edhe banorë të fshatrave përreth e janë pro formimi të Kijevës si Komunë në vete, duke thënë se mbështetja e tyre nuk do të mungojë.
Grupi punues për themelimin e komunës së Kijevës në përbërje me Labinot Gashin, Zenel Berishën dhe Mentor Kryeziun të marten (7 prill) zhvilluan një takim me zëvendësministrin e Ministrisë së Administrimit të Pushtetit Lokal, Bajram Gecajn. Në takim mori pjesë edhe deputeti nga Malisheva, Sali Morina.
Profesor Labinot Gashi, njëri nga ideatorët për themelimin e Komunës së Kijevës në një prononcim për portalin ‘Te Sheshi’, ka thënë se decentralizimi i pushtetit është trend ndërkombëtar evropian që ka për qëllim ofrimin e shërbimeve me afër qytetarëve. “Ky decentralizim nuk duhet të jetë kurrsesi mbi baza etnike e politike. Por çështja kryesore të komunat e reja është mundësia e funksonimit të tyre pas themelimit të tyre.
Profesor Gashi thotë se rithemelimi i Komunës së Kijevës është vullnet i banorëve të saj dhe fshatrave përreth. “Qytetarëve iu interesojnë që të kenë shërbimet sa më afër dhe jo të udhëtojnë gjatë për të marrë një shërbim të vogël. Nëse Kijeva rifiton statusin e Komunës do të përfitonin rreth 20 mijë banorë, do të kishte zhvillim dhe mirëqenie më të mirë për familjet e tyre, pra do të bëhej një qytezë model për gjithë Kosovë”, ka deklaruar Gashi.
Jo vetëm banorët e Kijevës kanë përkrahur iniciativën e ndërmarrë, por edhe banorë të fshatrave përreth.
Destan Gashi, banor nga fshati Balincë i Komunës së Malishevës ka qenë ndër të parët që e ka përshëndetur iniciativën për rithemelimin e Komunës së Kijevës duke thënë se është i gatshëm të koontribuojë me banorët e fshatrave përreth në këtë drejtim. “Kjo është ide shumë e qëlluar por duhet ta themelojmë grupin inicues nga fshatrat, Kijevë, Bubavec, Mleqan, Llozicë, Balincë, Plloqicë, Gulluboc, Vërmicë, Drenoc, Stapanicë (Burim) dhe fshati Shkoroshnik të cilët fshatra kanë qenë në ish Komunën e Kijevës diku deri në vitin 1961.
‘Premtimi i ish kryeministrit Thaçi’
Qytetarë të shumtë nga Kijeva vitin e kaluar kishin pritur kryeministrin e Kosovës, Hashim Thaçi, cili kishte ngarkuar Ministrinë e Pushtetit Lokal që të përgatisë dokumentacionin që Kijeva të jetë Komuna më e re e Kosovës. “Nëse gjatë luftës Kijeva ka qenë vendi më i rrezikshëm në botë, unë u them tash se Kijeva do të jetë Komuna më e bukur e Republikës së Kosovës”, kishte deklaruar Thaçi sa ishte në postin e kryeministrit.
Kijeva ishte komunë para Malishevës
Fshati Kijevë ka patur statusin e komunës që në fillim të shekullit të kaluar dhe deri ne vitin 1924. Komuna në Kijevë u rikthye gjatë luftës së dytë botërore, kurse nga viti 1946 e deri më 1960 ishte njësi administrative. Në mars të këtij viti banorët e Kijevës dhe të fshatrave përreth u bashkuan për rithemelimin e Komunës së Kijevës. Më datë 17 Mars 2014 Grupi Nismëtar hapi zyrën e vet afër restaurant “Dini”, pranë udhëkryqit në Kijevë!
Kijeva me infrastrukturë të një qyteti
Kijeva ka dy shkolla, njëra fillore “Kajtaz Ramadani” (ish Adem Bajrami), nga viti 1936 ; si dhe shkolla e mesme profesionale Juridiko-Ekonomike “Lasgush Poradeci” ( ish Gjimnazi i atëhershëm “Luigj Gurakuqi”), e para shkollë e mesme e hapur nëpër fshatrat e Kosovës e përuruar në të njejtin vit me Universitetin e Prishtinës në Tetor 1970.
Kijeva poashtu ka shtëpinë e shëndetit, shtëpinë e kulturës, postën, bibliotekën, kuadro të arsimuara, qendra tregtare të shumta. Andaj, e gjithë kjo infrastrukturë tregon që Kijeva meriton të ribëhet komunë.
Pozita Gjeografike e Kijevës
Kijeva shtrihet në qendër të Kosovës (rreth 50 kilometra larg Prishtinës). E përshkon rruga Prishtinë-Pejë, ka një pozitë të mirë dhe të favorshme gjeografike si dhe strategjike në vend, me një potencial të madh zhvillimi.
Pozita e saj gjeografike tepër atraktive bënë që nga këtu lirëshem mund të shkohet pëveç Prishtinës dhe Pejës edhe në Prizren, drejtimi i Malishevës si dhe në Gjakovë në të majtë para Klinës. /tesheshi.com/
