Kreu i opozitës Lulzim Basha u shfaq sot në fushatë me një mik gjerman, që e prezantoi si këshilltar të Merkelit dhe si mbrojtës të programit ekonimik të propozuar nga PD-ja në këtë fushatë elektorale.
Hans Joachim Falenski është këshilltar politik në parlamentin gjerman për grupi parlamentar CDU, që drejtohet nga kancelarja Angela Merkel.
Falenski, një njeri me përvojë në çështjet e politikës së jashtme, kryesisht atë të Rusisë dhe Ballkanit Perëndimor, i ka qëndruar në krah Bashës që nga koha kur ai protestonte në çadër.
Falenksi është një nga bashkëpunëtorët e ngushtë të nënkryetarit të Bundestagut gjerman, Franz Josef Jung, i cili u bë i njohur në Tiranë për letrën me nota të rrepta që i nisi Bashës, kur ai po shkonte drejt bojkotit të zgjedhjeve.
Qëdrimi i Jung e më pas i zv/kancelarit Gabriel kundër radikalizimit të protestës së opozitës treguan një ftohje të gjermanëve ndaj opozitës shqiptare.
Por, pas marrëveshjes së madhe me Ramën me sa duket Basha ka rifituar miqësinë gjermane dhe madje ka dalë në fushatë me këshilltarin e Jung.
Duke folur para elektoratit në Durrës, Falenski vleresoi sot programin ekonomik të Partisë Demokratike, si efikas, të realizueshëm e që do të vërë në lëvizje ekonominë shqiptare. Ky program, tha Falenski, funksionon çdo ditë në Gjermani, krijon vende pune, dhe do funksionojë edhe në Shqipëri.
Ai bëri hapur fushatë pro Bashës duke shënuar një precedent në fushatat elektorale shqiptare, ku rrallë ndodh të shohësh politikanë të huaj të përfshihen drejpërdrejt.
“Qeveria Rama duhet të ikë dhe kjo është më e thjeshja dhe më e mira. Socialistët nuk mund të bëjë ekonomi dhe nuk mund të menaxhojnë para. Kjo qeveri nuk ia ka arritur dhe nuk e ka bërë këtë. Partia Demokratike në bashkëpunim me Partinë Kristian-Demokratike Gjermane dhe me Fondacionin Kondard Adenauer ka hartuar këtë program ekonomik. Ky program siguron një ekonomi të fortë dhe më shumë vende pune. Partia Kristian-Demokratike Gjermane së bashku me Angela Merkelin e vërtetojnë çdo ditë që ky program funksionon dhe cdo ditë krijohen vende të reja pune. Prandaj ju them që ky program funksionon ndaj na besoni ne dhe i besoni Lulzim Bashës. Shkoni votoni me 25 Qershor. Ju thoni të gjithë miqve dhe të njohurve tuaj të shkojnë të votojnë. Votoni për ndryshimin e qeverisë dhe do hyni më shpejt në Europë”, tha Falenski.
Deklarata e tij u shpërnda nga zyra e shtypit pranë PD-së./tesheshi.com/
