Do të votohet ditën e sotme në Këshillin e Sigurimit të OKB-së një rezolutë në mbështetje të marrëveshjes së armëpushimit në Siri, të ndërmjetësuar nga Rusia e Turqia.
Në rezolutë kërkohet në të njëjtën kohë të garantohet mundësia për shpërndarjen e ndihmave humanitare në tërë Sirinë në mënyrë të sigurtë e të shpejtë.
Rusia dhe Turqia ua përcollën mbrëmjen e së enjtes anëtarëve të Këshillit të Sigurimit marrëveshjen e armëpushimit dhe projektrezolutën. Më tutje u soll një projekt i rishikuar nga ambasadori rus në OKB, Vitaly Churkin, i cili u bëri thirrje përfaqësuesve të vendeve anëtare të Këshillit të Sigurimit ta mbështesin atë, si dhe kërkoi një votim për ditën e sotme.
“Këshilli i Sigurimit duhet të marrë pjesë në këtë proces të rëndësishëm,” deklaroi Churkin.
Në projekrezolutë thuhet se, “e vetmja zgjidhje e qëndrueshme për krizën e tanishme në Republikën Arabe Siriane është përmes një procesi politik dhe përfshirës të udhëhequr nga Siria e të mbështetur në komunikatën e Gjenevës të 30 qershorit 2012”.
Kjo komunikatë, e cila ka marrë miratimin e vendeve me rëndësi kyçe, bën thirrje për formimin e një qeverie kalimtare me fuqi të plota ekzekutive dhe për hapa që çojnë në zgjedhje të përgjithshme. /tesheshi.com/
