Rusia i ka bërë thirrje Këshillit të Sigurimit të OKB-së për një “armëpushim humanitar” në konfliktin e armatosur në Jemen. Rusia ka kërkuar një mbledhje urgjente të Këshillit dhe ka shpërndarë një projekt-rezolutë përmes së cilës kërkohet “ndalimi i rregullt dhe i detyrueshëm” i sulmeve ajrore të koalicionit të forcave saudite, kundër rebelëve shiit Houthi, për të mundësuar evakuimin e personelit të huaj në Jemen. Qëllimi i armëpushimit është të evakuohen diplomatët e huaj dhe civilët, që ndodhen në zonën e luftimeve midis rebelëve shiitë dhe forcave mbështetëse të presidentit të vendit. Gjithashtu në projekt- rezolutë kërkohet “lejimi i shpejtë dhe i sigurtë i ndihmave humanitare për njerëzit në nevojë” në vendet në jugperëndim të Azisë.
Pas mbledhjes, ambasadorja e Jordanisë në OKB, Dina Kawar, kryesuese e këshillit aktual theksoi se anëtarët e tij ” përsërisin shqetësimin për situatën e rëndë humanitare”. Sipas saj anëtarëve të Këshillit u duhet kohë për të shqyrtuar rezolutën e Rusisë. Këshilli i Bashkëpunimit të Gjirit kishte propozuar më parë një projekt rezolutë, për të vendosur një embargo armësh ndaj forcave rebele Houthi, përkrahës kryesor i të cilëve është Irani.
