Këshilli i Mandateve dhe Rregullores miratoi me konsensus dhënien e autorizimit për të lejuar arrestin e deputetit Armando Prenga.
Por vendimi final do të merret nesër pasdite në seancën plenare të Kuvendit. Deputeti i Partisë Socialiste mbërriti rreth orës 19:30 minuta në Kryesinë e Kuvendit i shoqëruar nga forcat e policisë. Ai u shpreh para Këshillit të Mandateve se e gjitha kjo është një sajesë nga komisionerë të Partisë Demokratike, të cilët i njeh i gjithë qyteti.
“E gjithë kjo është një vorbull e ngritur ndaj familjes time për ta sulmuar atë. Nëse kam shkelur ligjin do të përballem me të”, ka thënë Prenga, ndërsa kërkoi që kjo ngjarje të shihet me përkushtim, “pasi duan ta promovojnë si çështje politike”, tha deputeti.
Pas përfundimit të Mbledhjes së Këshillit të Mandateve, deputeti i Partisë Demokratike, Gent Strazimiri, akuzoi edhe një herë si përgjegjës për këtë ngjarje Kryeministrin Rama dhe Kryetarin e Kuvendit Ilir Meta.
Në kërkesën drejtuar Kuvendit, kryeprokurori Adriatik Llalla ka deklaruar se, nga provat e administruara deri më tani gjatë fazës së hetimit, rezulton se deputeti Prenga dyshohet të ketë konsumuar veprat e mësipërme penale gjatë konfliktit të ndodhur me disa shtetas të tjerë, ngjarje e ndodhur mesnatën mes së premtes dhe së shtunës në qytetin e Laçit. Veprat, të cilat dyshohet t’i ketë kryer deputeti Prenga, janë me rrezikshmëri të lartë shoqërore dhe parashikohen si krime në Kodin Penal.
Duke argumentuar dyshimet e arsyeshme për kryerjen e këtyre veprave penale nga ana e deputetit Prenga, Prokuroria e Përgjithshme kërkon, me qëllim që t’i hapet rrugë një hetimi të plotë dhe të gjithanshëm nga organi i hetimit, dhënien e autorizimit nga Kuvendi për arrestimin e tij, bazuar në Kushtetutën e Republikës së Shqipërisë. /tesheshi.com/
