Ndërkohë që është mbledhur Këshilli i Mandateve, i cili po diskuton kërkesën e opozitës për heqjen e imunitetit të deputetit të Partisë Socialiste, Koço Kokëdhima, ky i fundit ka dërguar avokatin e tij përfaqësues në këtë mbledhje, ndërsa vetë, nga ambientet e Qendrës Spitalore Universitare “Nënë Tereza” në Tiranë, ka vizituar një qytetar nga Himara, i cili është në një gjendje të rëndë shëndetësore prej tre javësh, pasi ka rënë në burg, si përdorues kanabisi.
Duke marrë shkas nga ky rast, përpara mediave, Kokëdhima ka kërkuar ndryshimin e kuadrit ligjor për të lehtësuar dënimet për përdoruesit e marijuanës.
Duke identifikuar të riun 21 vjeçar si Mihal Llazari, deputeti Kokëdhima ka bërë me dije se më shumë se 1 vit e gjysmë ai është në rrugë, në gjendjen e një tronditje të thellë psikologjike, duke qenë se prej tre javësh nuk ka mundur të komunikojë, ndërsa sot arriti të shkruajë edhe një letër për drejtorin e Përgjithshëm të Burgjeve.
“Është nga Himara dhe nuk ka kryer asnjë lloj krimi por është përdorues hashashi. Hidraulik që e ndante jetën mes Greqisë dhe pranë të atit në Himarë kur nuk kishte punë. Askush nuk gatuante për të. Ishte thjesht një përdorues hashashi dhe i ati i tij, i shqetësuar nga ky fakt, kërkoi ndihmën e policisë së Saliut dhe pasi ata e siguruan se do ta ndihmonte, i raportoi policisë vendin ku ai ruante drogën. Policia e arrestoi dhe ai ndodhet tani në gjendje shumë të keqe shëndetësore”,- tha Kokëdhima për të riun.
Më tej, deputeti i Vlorës bëri me dije se fati i tij është i ngjashëm me fatin e shumë të tjerëve, ndërsa shtoi se asnjë vend i botës nuk i ndëshkon përdoruesit e hashashit ashtu si i ndëshkojmë ne djemtë dhe vajzat.
“Kërkoj një legjislacion të arsyeshëm penal për krimet që lidhen me përdorimin e marijuanës. Kjo bëhet më e arsyeshme po të kemi parasysh kontekstin e sotshëm të zhvillimit të ngjarjeve, ku ekonomia e kanabisit është shumë fitimprurëse sot. Mendojmë një amnisti për përdoruesit e kanabisit. U bëj apel gjykatësve që të lirojnë dhe të lejojnë Mihal Llazarin të shkojë në shtëpi”,- u shpreh Kokëdhima.
Ai shtoi se lidhur me çështjen e marijuanës, bën një diskutim kulturor dhe politik, duke qenë se ka shtruar nevojën që të diskutohet për një çështje kaq të rëndësishme, pasi bashkë do të mund të gjejmë zgjidhje më të mira si nga pikëpamja sociale dhe ajo ekonomike./tesheshi.com/
