Lëvizja majtiste “Solidariteti” ka nisur mbrëmë prej orës 18:00 serinë e protestave për mbrojtjen e jetës së grave shtatzëna nëpër spitalet e Maqedonisë, si dhe të jetës së grave, fëmijëve dhe pleqve në rrugë.
Ajo përcolli porosinë se duhet përmirësuar kushtet në trafikun rrugor dhe në spitale, me qëllim që të mos ndodhin më tragjedi njerëzore.
Kjo lëvizje paralajmëroi se për çdo natë do të protestojë në të njëjtën orë para godinës së qeverisë, deri në momentin e marrjes së përgjegjësisë për të gjitha këto fatkeqësi njerëzore nga ana e fajtorëve kryesorë, që sipas saj janë ministri i shëndetësisë, Nikolla Todorov, dhe kryeministri maqedonas, Nikolla Gruevski.
Kujtojmë që brenda një jave në rajonin e qytetit të Shkupit ka patur 18 aksidente rrugore, ku janë
lënduar 17 persona dhe një tjetër ka humbur jetën. Ndërsa, brenda dy ditëve, në spitalet gjinekologjike në Shkup dhe Gjevgjeli kanë humbur jetën gjatë lindjes dy gra dhe një fëmijë i sapodalë në jetë. /tesheshi.com/
