Presidenti rus Vladimir Putin nuk po e shtyn Bjellorusinë në një luftë me Ukrainën, tha udhëheqësi bjellorus Alexander Lukashenko, por shtoi se nëse vendi i tij sulmohet nga jashtë, ai do të përgjigjet me të gjitha mjetet në dispozicion, përfshirë armët bërthamore, raporton agjencia Reuters.
“Nëse Bjellorusia do të bashkohej…çfarë do të arrinte? Asgjë”, tha Lukashenko, një nga aleatët më të ngushtë të presidentit rus Putin.
Bjellorusia kufizohet me Ukrainën, Rusinë dhe tre anëtarë të NATO-s, përfshirë Poloninë.
“Nëse ukrainasit nuk e kalojnë kufirin tonë, ne kurrë nuk do të marrim pjesë në luftë. Por ne gjithmonë do ta ndihmojmë Rusinë, ata janë aleatët tanë”, tha Lukashenko në një intervistë me Diana Panchenko, një gazetare ukrainase pro-ruse.
Ai shtoi se beson se Putini i ka arritur tashmë qëllimet e tij në atë që Rusia e quan një “operacion special ushtarak” në Ukrainë dhe se të dyja palët duhet të ulen në tryezën e bisedimeve dhe të diskutojnë të gjitha çështjet, përfshirë fatin e Krimesë dhe të tjera territore ukrainase të pretenduara nga Rusia.
“Negociatat duhet të fillojnë pa asnjë kusht. Ky është thelbi i diplomacisë. Duhet të ulemi në tryezë dhe të diskutojmë gjithçka. Dhe Krimenë dhe Khersonin, Zaporozhyen, Donetskun dhe Luhanskun”, theksoi ai.
Lukashenko paralajmëroi se Bjellorusia do të përgjigjet në rast të një sulmi nga jashtë, duke përfshirë armët bërthamore që Rusia ka vendosur në territorin e saj.
“Nëse agresioni fillon nga Polonia, Lituania, Letonia, ne do të përgjigjemi me gjithçka që kemi”, tha presidenti bjellorus.
“Dhe kundër Ukrainës, nëse ajo kryen agresion kundër nesh, ne nuk do të përdorim vetëm armë bërthamore. Ne kemi më shumë se vetëm armë bërthamore. Dhe nëse kaloni vijën e kuqe, ne nuk do t’ju paralajmërojmë, do të godasim qendrat e pushtetit politik. Do ta bëjmë pa paralajmërim”, theksoi Lukashenko. /tesheshi.com/
