Shkalla e lartë e korrupsionit pengon avancimin e Kosovës. Kështu u tha në një konferencë për shtyp të Institutit Demokratik të Kosovës (KDI) me rastin e publikimit të Indeksit të perceptimit të korrupsionit 2015, të përgatitur nga Transparency International me seli në Berlin.
Artan Canhasi nga KDI, tha se sipas Indeksit të perceptimit të korrupsionit, Kosova nuk ka shënuar ndonjë përparim krahasuar me dy vitet e fundit.
“Kosova është vlerësuar me 33 pikë, siç ishte vlerësuar edhe vitin e kaluar. Vlerësimi përgatitet sipas metodologjisë së Transparency International. Është edhe më shqetësues fakti se Kosova në këtë raport qëndron edhe me keq krahasuar me vendit e rajonit, si Shqipëria, Bosnja dhe Hercegovina, Serbia, Maqedonia dhe Mali i Zi”, tha Canhasi.
Ai shtoi se mungesa e kapaciteteve të gjyqësorit, mungesa e llogaridhënies, integritetit dhe transparencës gati në të gjitha nivelet e pushtetit ekzekutiv, kanë bërë që Kosova të kategorizohet në të njëjtën grup me Moldavinë dhe më keq se të gjitha shtetet e rajonit. Përparimi që është bërë në fushën e prokurimeve të përbashkëta është dëmtuar nga ndërhyrjet në pikat tjera të sistemit sikurse në Organin Shqyrtues të Prokurimit.
Duke shtjelluar rëndësinë që ky raport ka në botë, Visar Sutaj, po ashtu nga KDI, tha se ky indeks bazohet në opinionet e ekspertëve të korrupsionit të sektorit publik.
“Vlerësimi i shteteve mund të përmirësohet nga qeverisja e hapur, ku udhëheqësit i japin llogari publikut, ndërsa vlerësimi i dobët është shenjë e mitmarrjes së përhapur, mungesës së dënimeve për afera korruptive dhe institucioneve publike, të cilat nuk i përgjigjen nevojave të qytetarëve”, tha Sutaj.
KDI vlerëson se renditja e Kosovës do të përmirësohej nëse zbatimi i ligjit përmirësohet, rritet llogaridhënia dhe integriteti i institucioneve si dhe nëse do të rritej bashkëpunimi dhe efikasiteti i institucioneve që luftojnë korrupsionin.
Në nivel botëror, Danimarka radhitet e para edhe këtë vit me 91 pikë kurse Koreja Veriore dhe Somalia e ndajnë vendin e fundit me vetëm tetë pikë secila./tesheshi.com/
