Nga Mensur Krasniqi
Pas një maratone bisedimesh që kanë zgjatur diku rreth 15 orë, të martën në mëngjes katër partitë më të mëdha në Maqedoni kanë rënë dakord që për ‘Prokuror Special’ të zgjidhet Katica Janeva.
Zgjedhja rreth çështjes më delikate sa i përket numrit të prokurorëve, si opsion ka ngelur propozimi që propozoi paraprakisht Brukseli, që Prokurori Special vet të caktojë se sa prokurorë do të duhet të përfshihen në procesin ligjore për rastet “Përgjimet”, dhe “Puç”.
Propozim-ligji pritet të hyjë në rend dite në Kuvend. Ka gjasa që i njëjti edhe të votohet, të nxirret në gazetën zyrtare, të nënshkruhet, të hyjë në fuqi dhe në bazë të kësaj të zgjedhet Prokurori Special.
Sipas informatave të “eMagazin”, Prokurorja Speciale Katica Janeva vlen si njëra ndër prokuroret më të respektuara në profesionin e saj, edhe pse për opinionin e gjerë është e panjohur, ndërsa sipas disa informatave tjera, deri tani ajo ka hetuar lëndë të vogla gjyqësore, ashtu që rastet mbi “përgjimet” dhe “Puç”, do të jenë lëndët e para me peshë që do ti hetojë.
Thuhet që ekspertit belg, njëkohësisht ndërmjetësues në zgjidhjen e krizës politike Piter Vanhoute, i ka plasur durimi dhe ka qortuar zëshëm ish-shefin e shërbimit sekret maqedonas, Sasho Mijallkov . Ngjarja ka ndodhur në Klubin e deputetëve në Shkup në bisedimet maratonike për të zgjedhur prokurorin e ri special.
Vanhoute ka qenë tepër i irrituar nga sjellja e Mijallkovit i cili kishte ardhur për t`iu bërë presion grupeve të punës, mirëpo këtë eksperti belg nuk e ka toleruar.
Paraqitja e ish drejtorit të DSK-së, Sasho Mijalkov, në bisedimet për ligjin për Prokurorin Special nuk ka qenë befasia e vetme.
Menjëherë pasi qVanhoute dha deklaratë në të cilën tregoi se një parti e madhe po e pengon procesin e zgjedhjes së Prokurorit Special, Sasho Mijalkov personalisht ka vendosur që të përfshihet në bisedimet e ekipit të VMRO-DPMNE dhe të provoje që t`i rregullojë punët.
Mënjehërë, kushëriri i kryeministrit në fillim të bisedimeve ka tentuar që t`i sqaroje ndërmjetësuesit Vanhoute se propozim ligji për prokurorin special për të cilin po bisedojnë, është jo kushtetues.
Sulmin e këtillë direkt nga ish shefi i DSK-së, ndërmjetësuesi Vanhoute nuk ka mundur që në mënyrë diplomatike ta menaxhojë, përkundrazi e ka ngritur tonin para të gjithë grupeve të punës.
Pasi Vanhoute ka përfunduar, ka dalë nga vendi, ndërsa Mijalkov i ofenduar nga toni me të cilin i është drejtuar, ka komentuar se prej ku merr të drejtën një ndërkombëtar të bisedojë me atë në këtë formë.
Të befasuar të pranishmit i kanë sqaruar Mijallkovit se ndërmjetësuesi nuk bisedon në këtë mënyrë me to, por kjo është hera e parë dhe sjellja eksplozive ka qenë vetëm me atë./tesheshi.com/
