Takimi i sotëm i katërshes politike: Nikolla Gruevski, Zoran Zaev, Ali Ahmeti dhe Menduh Thaçi, pritet të japë verdiktin final për atë se çka parasheh dhe si do të vendoset për periudhën e tranzicionit deri në zgjedhjet e prillit të vitit 2016, ashu siç u dakorduan më herët liderët në fjalë.
E përballur me presionin vendor dhe sidomos atë ndërkombëtar, qeveria Gruevski është pajtuar me kërkesat e opozitës, të cilat në të njëjtën kohë paraqesin dhe konstatime të Këshillit të BE-së të pasqyruara në rekomandimet e raportit të Rajnhard Pribes, i cili ishte i stërmbushur me nota negative; por problem kryesor në negociatat e sotme që do të zhvillohen mes katër liderëve politik, do të jetë dorëheqja e kryeministrit Nikolla Gruevski, gjë për të cilën ka kohë që insiston opozita maqedonase.
Konfirmimi i kësaj ka ardhur nga vet kryeministri Gruevski, i cili për ta komplikuar akoma më shumë situatën, gazetës Financial Times i tha se refuzon kërkesën për dorëheqjen e tij, por theksoi se është i gatshëm t`i pranojë propozimet e opozitës rreth shpërndarjes së vendeve ministrore dhe vërejtjet rreth mbajtjes së zgjedhjeve.
Sipas tij, këto kompromise do ta rrisin besimin në zgjedhjet e parakohshme të caktuara për në prill të vitit 2016, të cilat Bashkimi Evropian i sheh si kritike për stabilitetin më të gjerë në rajon: “Jemi të gatshëm të pranojmë shumë ide të cilat do ta rrisin besimin e opozitës ndaj procesit zgjedhor”, deklaroi Gruevski në intervistë për Financial Times.
Sakaq, lideri opozitar Zoran Zaev, deklaroi se shansi i fundit i Gruevskit për të siguruar zgjedhje korrekte është që të jep dorëheqje para zgjedhjeve: “Nëse ai mbetet, asgjë nuk ndryshon”, tha Zaev sipas të cilit për partinë e tij, kruciale është që Gruevski të jep dorëheqje së paku 6 muaj para zgjedhjeve të parakohshme parlamentare.
Në takimin e sotëm që do të mbahet në Shkup, nuk do të marrë pjesë komisari Johanes Han. Burime nga BE-ja kanë bërë me dije Han nuk do të ndërmjetësojë në bisedimet, porse ai do vazhdojë të jetë në dispozicion: “Shpresoj për përmirësim dhe shpresoj në rezultate të para konkrete”, ishte mesazhi i eurokomusarit Han dërguar para takimit.
Në rast se negociatat e sotme dështojnë, LSDM-ja opozitare tha se do t`i radikalizojë protestat.
Përgatiti: Bekim Laci – tesheshi.com
