Pas referendumit të rreth 10 ditëve më parë për pavarësinë e Katalonjës nga Spanja, duket se ekonomia e rajonit ka nisur të ndjejë pasiguri. Kjo edhe për faktin se drejtuesit e Katalonjës kanë paralajmëruar një shpallje të njëanshme të pavarësisë mbrëmjen e sotme në Parlamentin e rajonit.
E ndërsa presioni i Madridit por edhe i disa prej vendeve anëtare të BE-së ndaj drejtuesve rajonalë është në rritje, për të mos kaluar në veprime të njëanshme, ekonomia e Katalonjës ka nisur të ndjehet e pasigurtë.
Disa prej selive qendrore të bankave, por edhe kompanive të mëdha, janë larguar nga Katalonja. Mes kompanive që kanë deklaruar largimin e selive përfshihet edhe “Gas natural” apo bankat
“Caixabank”, dhe “Banco Sabadell”. Në vijim, kompania “Albertis”, e cila është e përqëndruar në fushën e shërbimeve dhe administrimit të autostradave, ka deklaruar zhvendosjen e selisë në Madrid. Drejt largimit janë edhe “cellnex Telecom” dhe “Colonial”. Të gjitha këto zhvendosje kanë të bëjnë me pasiguritë juridike të gjeneruar nga situata politike aktuale në Katalonjë.
Duke përmendur pasojat ekonomike të një pavarësie të mundshme, kreu i një lobi të fuqishëm ekonomik katalonjas, “Rrethi i Ekonomisë”, i kërkoi gjatë fundjavës presidentit të rajonit, Carles Puigdemont, që të mos vazhdojë më në projektin e tij për pavarësi.
“Katalonja përfaqëson rreth 20 për qind të ekonomisë spanjolle (PBB), 22 për qind të industrisë, 25 për qind të eksporteve spanjolle dhe 40 për qind të sipërmarrjeve të mëdha me më shumë se 200 punonjës”, liston Jesus Castillo, ekonomist spanjoll për bankën ndërkombëtare “Natixis”.
“Mund të themi se më vete, rajoni mund të jetë jashtëzakonisht i pasur, por ekonomia nuk funksionon kështu. Sipërmarrjet thonë se nëse gjenden në një territor që nuk është më në Bashkimin Evropian dhe në eurozonë, nuk do të qëndrojmë”, thekson ai.
EricDor, drejtori i studimeve ekonomike në Shkollën e Menaxhimit IESEG, në Paris, thotë se nëse Puigdemont shpall pavarësinë, kjo nuk do të thotë që Katalonja do të njihet nga shtetet e tjera.
Sipas tij, ajo do të mbetet juridikisht një pjesë e Spanjës dhe si do që të jetë duhen bërë negociata. /tesheshi.com/
