Nga Gani Gashi
Një katastrofë ekologjike në përmasat e një masakre ka ndodhur me peshkun e lumit Sitnica në atë pjesë që kufizohet me fshatin Frashër dhe Këçiq i vogël.
Askush nga institucionet e Mitrovicës si dhe shoqata e peshkatarëve deri më tani nuk dinë se si ka ardhur deri tek kjo ngordhje masive e peshqve. Peshkatarët me lot në sy thonë se do të duhet vite që kjo katastrofë ekologjike të riparohet.
Një peshkatar tha se deri të premten në mbrëmje ka peshkuar dhe se gjithçka ka qenë në rregull deri në ora 20:00.
“Të shtunën nuk kam qenë fare në këtë pjesë të lumit, ndërsa të dielën në orët e pasdites kur kam shkuar nuk u kam besuar syve se çfarë kam parë: një ngordhje masive e peshqve” ka thënë peshkatari.
Sipas tij, këto ose ndonjë njeri i pa përgjegjshëm ka hedhur helme në ujë, ose kanë peshkuar më gjenerator apo me ndonjë lloj dinamiti. Llogaritet që të jenë diku mbi 14 ton peshk të ngordhur, thotë peshkatari mitrovicas.
Në anën tjetër, Gani Beshiri, kryetar i Shoqatës së peshkatarëve ‘Ibri’, të Mitrovicës ka theksuar se për këtë katastrofë ekologjike që ka ndodhur në lumin Sitnica, është njoftuar vetëm pasi është kontaktuar nga portali ‘tesheshi’. “Si do që të jetë kjo qenka jo vetëm katastrofë ekologjike por edhe masakër dhe për këtë menjëherë do të njoftoj Federatën e peshkatarëve të Kosovës si dhe policinë”, ka thënë Beshiri.
Sipas tij, duhet pritur që inspektorët e Ministrisë së Bujqësisë, pra ata të Veterinarisë, të vijnë në vendin e ngjarjes, të marrin mostrat dhe të analizojnë se çfarë në realitet e ka shkaktuar këtë ngordhje kaq masive.
Ndërsa Drejtori i Drejtorisë së Inspekcionit të Komunës së Mitrovicës, Naim Hajra, pas marrjes së informacionit nga portali tesheshi.com, ka njoftuar inspektorë komunal që të dalin në vendin e ngjarjes. Hajra gjithashtu ka njoftuar edhe policinë e Kosovës si dhe Ministrin e Bujqësisë si dhe inspektorët e AVUK-ut.
“Do t`i marrim mostrat do t`i dërgojmë në laborator në Prishtinë dhe të shohim se çka e ka shkaktuar këtë katastrofë ekologjike në lumin Sitnica”, ka thënë Hajra. /tesheshi.com/
