“Po i afrohem gjithnjë e më tepër tërheqjes.” Këto janë fjalët e Iker Kasijasit, portierit spanjoll që shkroi historinë me kombëtaren e tij dhe me Realin e Madridit.
Njeriu që fitoi dy herë kampionatin europian e një herë atë botëror me Spanjën, veç shumë titujve me Realin e Madridit në nivel kombëtar e ndërkombëtar, e pranon se koha shkon dhe për të, e se po i afrohet fundit të karrierës.
“Koha shkon për çdokënd, dhe unë nuk bëj përjashtim. Nuk e di nëse ky do të jetë viti i fundit që luaj me Spanjën.”
Kasijas luajti të dielën në miqësoren ndaj Rumanisë, dhe la mbresa me pritjet e bëra. 166 paraqitjet me kombëtaren flasin vetë për vlerat e tij, por ai është i vetëdijshëm se çdo gjë e ka një fund.
“Kam shpresuar dhe do të më pëlqente të isha me këtë ekip plot me të rinj,” ka thënë Kasijas në përgjigjet e tij në median sociale pas miqësores ndaj rumunëve.
Kasijas mbron portën e Portos në kampionatin portugez, por nuk është çudi që në fund të sezonit të kërkojë një tjetër ekip. Ashtu si në përfaqësuese, ku me shumë mundësi kampionati europian, luan apo nuk luan si portier i parë, do të shënojë fundin e karrierës së tij ndërkombëtare. /tesheshi.com/
