Nga Mensur Krasniqi
Nëse ka diçka që qytetarët e Shkupit mund të mburren më së shumti që e kanë, ajo padyshim se është kanioni i Matkës. E ku tjetër veçse aty dynden shkupjanët në fundjavën e tyre shplodhëse. Kanioni i ngushtë në pjesën e rrjedhës së poshtme të Lumit Treska, i shtrirë 15 kilometra në veriperëndim të Shkupit, përfshin një sipërfaqe prej 5000 hektarësh të liqenit të mrekullueshëm të Matkës bashkë me malet e shpatet e pjerrëta, dhe me shpella të tjera të mrekullueshme e manastire piktoreske mesjetare.
Shpella e Vrellës është shpella më e njohur nga dhjetra të tjera në kanionin e Matkës, e cila është e nominuar për zgjedhjen e një nga shtatë çuditë e botës. Deri më tani është studiuar disa herë. Sipas teorive shkencore, kjo shpellë është e thellë 330 metra, gjegjësisht thuhet që është shpella më e thellë në botë.
Këtu gjenden edhe 10 shpella të tjera nga të cilat më e shkurta është 20 metra, ndërsa më e gjata 193 metra dhe konsiderohet si shpella më e gjatë në Europë. Kanionin i Matkës e karakterizojnë edhe dy shkëmbinj të rrëpishëm, të lartë rreth 35 metra që janë sfidë e vërtetë për alpinistët.
Fundjavën që shkoi një temperaturë verore e kishte kapluar qytetin e Shkupit, andaj portali tesheshi.com ka shfrytëzuar ditën e diell që të bëj një xhiro rreth kanionit të Matkës në mënyrë që të shkrepë disa fotografi nga bukuritë e alpeve të saj. Në një cep të rrugës vërehej xha Muhamedi, i cili kishte me vite të tëra që po zhvillonte biznesin e tij me shitjen e veshjeve tradicionale ilire.
“Unë këtu jam mbi 10 vite, përçdo ditë nga mëngjesi deri në mbrëmje. Ja siç e shihni edhe vet merrem me shitjen e gjërave që shfaqin traditën e lashtë të shqiptarëve qysh në kohën e ilirëve. Kemi pra qorapë të trasha me ngjyra të ndryshme, pastaj kemi edhe “patiska”, siç quhet në gjuhën e popullit, dhe gjëra tjera të imëta që pasqyrojnë historinë e kanionit të Matkës. Interesi për këto gjëra më së shumti vjen nga turistët e huaj, meqë dëshirojnë t’ju mbetet kujtim ndonjë gjë nga ky vend”, shprehet për tesheshi.com Muhamed Saidi.
Përveç këtij biznesi të lashtë, Saidi së bashku me 5 djemtë e tij përkujdesen që turistëve t’ju sigurojnë shëtitje me anije nëpër ujërat që kalojnë në kanionin.
“Unë kam 5 djem, dhe të gjithë janë të angazhuar me punë këtu. Pra kemi 3 barka që punojnë me motor, dhe gati se gjithë ditën i bartim turistët që janë të interesuar për të bërë xhiro rreth kanionit të Matkës deri te shpella e Vrellës. Turistët ndahen mjaft të kënaqur nga shërbimi jonë, meqë u ofrojmë edhe shërbim të mirë edhe të lirë”, përfundoi Saidi. /tesheshi.com/
