Kandidati kryesor për drejtimin e laburistëve në Britani, premtoi se do të kërkojë falje për rolin e vendit të tij në luftën e Irakut.
Jeremy Corbyn, kandidati i radikalëve të majtë brenda laburistëve në zgjedhjet për kryetar të partisë, tha se do të kërkojë falje për “mashtrimin” e liderit të atëhershëm Tony Blair nën qeverisjen e të cilit Britania u bashkua në koalicion me Shtetet e Bashkuara në pushtimin e Irakut në vitin 2003.
Corbyn deklaroi për gazetën “The Guardian”: “Ka kaluar mjaft nga koha kur laburistët duhet të kërkonin falje ndaj popullit britanik që i tërhoqën në luftën në Irak mbi bazën e mashtrimit dhe popullit iraken për vuajtjet që ne ndihmuam t’i shkaktohen. Laburistët do ta kërkojnë këtë falje”, tha ai.
Corbyn ka qenë ndër 84 deputetët laburistë që votuan kundër luftës në një mocion parlamentar të vitit 2003, që kaloi me mbështetjen e konservatorëve të qendrës së djathtë.
Ky zotim i Corbyn vjen në një javë vendimtare, kur anëtarët e partisë Laburiste e mbështetësit e regjistruar nisin të votojnë për garën brenda partisë, nxitur nga Ed Miliband që dha dorëhejqen pas mposhtjes në zgjedhjet e përgjithshme të majit.
Corbyn ka premtuar të shtetëzojë shërbimet e domosdoshme dhe hekurudhat, të rrisë taksat dhe shpenzimet publike, ndërsa do të heqë armët bërthamore të Britanisë. Fushata e tij ka tërhequr, sidomos votuesit e rinj e ka nxitur krahasime me lëvizjet e krahut të majtë në Europë, si Syriza në Greqi apo Podemos në Spanjë. /tesheshi.com/
