Kufizimet për shkak të pandemisë COVID-19 kanë pasur ndikimin më të madh në modelet e konsumit të kanabisit dhe ekstazisë, me përdorimin e kanabisit në rritje dhe përdorimin e drogës në klub (MDMA/ekstazi) në rënie, sipas një studimi të publikuar nga Agjencia Evropiane e Drogës (EMCDDA).
Sondazhi, i cili përfshinte njerëz mbi 18 vjeç, u krye midis marsit dhe prillit 2021 në 30 vende (21 në BE dhe nëntë jashtë BE-së) kur shumica e popullsisë ishte nën masat e “burgimit” të lidhura me COVID-19.
Afro 50,000 të rritur (48,469) iu përgjigjën anketës nga 21 shtete anëtare të BE-së dhe Zvicra. Kanabisi ishte droga më e përdorur dhe 93 për qind e të anketuarve thanë se e kishin përdorur atë në 12 muajt e fundit, me pak dallime midis vendeve.
Çfarë tregoi hulumtimi
MDMA/ekstazia (35 për qind), kokaina (35 për qind) dhe amfetamina (28 për qind) ishin substancat e tjera të paligjshme më të shpeshta të raportuara dhe renditja e tre drogave ndryshonte nga vendi në vend.
Përafërsisht një e treta e të anketuarve (32 përqind) thanë se përdorin më shumë kanabis (bimor) dhe 42 përqind përdorin më pak MDMA/ekstazi.
Një e pesta (20 përqind) e të anketuarve në studim thanë se kishin përdorur LSD vitin e kaluar, 16 përqind përdorën substanca të reja psikoaktive (NPS) dhe 13 përqind ketaminë. Tre për qind e të anketuarve raportuan konsumimin e heroinës.
Megjithëse mostra që raportonte konsumimin e heroinës ishte e vogël, më shumë se një e katërta e këtyre të anketuarve (26 përqind) thanë se e përdornin drogën më shpesh gjatë periudhës së studimit.
Të dhënat e paraqitura i referohen të anketuarve që kanë përdorur të paktën një drogë të paligjshme në 12 muajt para studimit.
Megjithëse anketat online nuk janë përfaqësuese të popullatës së përgjithshme, kur kryhen me kujdes dhe kombinohen me metodat tradicionale të mbledhjes së të dhënave, ato mund të ndihmojnë në krijimin e një tabloje më të detajuar, realiste dhe në kohë të përdorimit të drogës dhe tregut të drogës në Evropë, sipas EMCDDA.
Më shumë se njëqind organizata morën pjesë në iniciativë, duke përfshirë pikat kombëtare të kontaktit të rrjetit Reitox, universitetet dhe OJQ-të.
Më të njohurat në Ballkan, kanabisi dhe kokaina
Një risi në sondazhin e vitit 2021 ishte pjesëmarrja e agjencive partnere nga Ballkani Perëndimor, përmes projektit të asistencës teknike të EMCDDA (IPA7).
Më shumë se 2000 të rritur (2174) nga Shqipëria, Kosova, Mali i Zi, Maqedonia e Veriut dhe Serbia iu përgjigjën anketës. Shumica e të anketuarve (91 përqind) thanë se kishin përdorur kanabis në 12 muajt e mëparshëm, pasuar nga kokaina (38 përqind), MDMA / ekstazi (22 përqind) dhe amfetamina (20 përqind).
Edhe këtu, rreth një e treta e të anketuarve (32 përqind) thanë se përdornin më shumë kanabis (bimor), ndërsa 34 përqind përdornin më pak MDMA/ekstazi. /tesheshi.com/
