Skuadra e kryeqytetit francez e ka fituar për herë të katër rresht kampionatin vendas. Një sundim i padiskutueshëm i PSG-së në kampionatin francez, çka shprehet në diferencën e jashtëzakonshme në pikë me Lionin e vendit të dytë, në golavarazhin fenomenal, me 97 gola të shënuar e 18 të pësuar, kur i duhet ende të luajë dhe dy takime të tjera.
Me një sërë lojtarësh të nivelit të lartë, ku spikasin Ibrahimovic e Cavani, Pastore e Di Maria, Thiago Silva e David Luiz, PSG nuk e ka aspak problem të ruajë vazhdimësinë e fitoreve në Francë. Por ajo çka i mundon drejtuesit e klubit është suksesi në Europë, që ende nuk duket në horizont.
Për këtë, francezët kanë hedhur sytë nga kampionati spanjoll, ku kanë piketuar tre emra. Ronaldo është në ballë të synimeve, i gjurmuar prej kohësh. Portugezi ka kaluar vite të tëra në Madrid, dhe mund të kërkojë të ndryshojë ambient. Veç kësaj, financuesit nga Katari të PSG-së nuk e kanë problem t’i plotësojnë kërkesat financiare të portugezit.
Një tjetër lojtar i pëlqyer për kampionët e Francës është portieri i Atletikos së Madridit, Oblak. Ai çmohet si më me cilësi se dy portierët aktualë të PSG-së, Sirigu dhe Trapp.
Ndërkaq, me gjithë sukseset e arritura, francezët duan ta zëvendësojnë trajnerin Laurent Blanc me argjentinasin Diego Simeone. Ky ka bërë emër me ngritjen e Atletikos së Madridit në nivele të pamenduara, duke tërhequr dhe vëmendjen e klubeve të mirëfinancuara.
Përveç këtyre, te PSG-ja kërkojnë të nënshkruajnë dhe me Lassana Diarra-në, mesfushorin e Olimpikut të Marsejës, që më herët ka luajtur dhe te Reali i Madridit. /tesheshi.com/
