Në kampionatin italian të futbollit lajmi i ditës është humbja 3-2 e kampionëve të Juventusit, në fushën e Sampdorias. Përveç shifrave që flasin vetë, dorjanët kanë luajtur ndeshjen më të mirë të sezonit, duke mos u tërhequr në mbrojtje, e duke vënë diktatin në mesin e fushës.
Pjesa e parë ishte më e ekuilibruar, me Juven që rrezikon me Higuain e Cuadrado. Por pas pushimit, Sampdoria luan me më shumë agresivitet dhe pas një krosimi të Quaiarela, Duvan Zapata kërcen më lart se Lihsteiner me kokë duke shënuar golin e parë. Bardh e zinjtë përpiqen të reagojnë dhe pas futjes së Dybala, rrezikojnë me Mandzukic dhe Higuain.
Por Sampdoria luan fort dhe është Torreira që me një gjuajtje të fortë pak jashtë 16-cçs, shënon golin e dytë. Trajneri Alegri bën edhe dy ndërrime të tjera, duke futur Douglas Costa dhe Matuidi, por skuadra nga Genoa gjen edhe golin e tretë, që vjen pas një goditjeje këndi, kur topi i kthyer kalon në krah të majtë e më pas krosohet në zonë, ku mbrojtësi Ferrari shënon nga afër.
3-0 dhe Sampdoria e quan ndeshjen të fituar. Në fakt minutat po kalonin pa ndonjë rrezik për portën e tyre, deri kur në minutën e 90-të, mbrojtësi Strinic, në vend të topit godet këmbën e Douglas Costa dhe shkakton penallti. Higuain shndërron në gol goditjen nga 11 metra. Juve përpiqet të karikohet në minutat shtesë dhe pas një kundërsulmi, Dybala shënon golin e dytë. Bardh e zinjtë vrapojnë me shpresën e shënimit të një tjetër goli, por nuk ka kohë. Skuadra e Allegrit pëson humbjen e dytë në kampionat dhe sheh Napolin të largohet 4 pikë. Ndërsa Sampdoria ngjitet në vendin e gjashtë, duke dëshmuar se këtë sezon, do t’i hapë punë çdo skuadre. /tesheshi.com/
